Qazaqstanǵa keletin týrıster nebary 4 kúnin osynda ótkizedi
«2022 jyly týrızmnen 389 mlrd teńge salyq túsken. Dúnıejúzilik týrıstik uıymnyń málimetteri boıynsha týrızm tabystylyǵy jaǵynan munaı óndirýden keıingi ekinshi orynda. Demek, týrızm salasyn damyta otyryp, ony ekonomıkanyń tolyqqandy draıverine aınaldyrýǵa bolady. Jalpy, bizde oǵan tolyq múmkindik bar. Biraq tıisti ınfraqurylymnyń joqtyǵy oǵan tejeý bolyp tur. Bir ǵana mysal, «Taldyqorǵan-Óskemen» tas jolynda jóndeý jumystarynyń bitpegenin, jol boıynda abattandyrylǵan sanıtarlyq-gıgıenalyq toraptardyń joqtyǵyn kórdik. Jazǵy demalys ýaqytynda Alakól jaǵalaýyndaǵy demalys aımaqtarynda elektr energııasy qýatynyń jetispeýi baıqaldy. Al ınternet pen baılanys sapasy syn kótermeıdi, jaǵalaýdy bekitý jumystaryn júrgizýge bólingen qarajat 3 jyldan beri ıgerilmeı kele jatyr», - dedi S. Dúısembınov Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, Jetisý oblysy ákimdigi daıyndaǵan smetalyq quny 4,9 mlrd tengeni quraıtyn Balqash demalys aımaǵynyń ınjenerlik-kommýnıkatsııalyq jelilerin salý jobasy áli de sheshimin taba almaı otyr.
Sonymen qatar depýtat Talǵar aýdanyndaǵy «Oi-Qaragai» taý shańǵy kesheninde áli kúnge deıin onyń múmkindigi tolyq paıdalanylmaı jatqanyn aıtty.
«Týrıstik maqsatta kelgen sheteldikter orta eseppen elimizde 4 kún ǵana bolǵan degen aqparat bar, al 3-4 kúnde eń bolmasa bir qalany aralap úlgerýge bola ma? 2022 jyldyń qańtar-qyrkúıeginde elimizge kelýshi týrıster sany 3,4 mln adam bolsa, basqa elderge demalýǵa barǵan qazaqstandyqtar sany - 5,6 mln. Otandastarymyzdyń basym bóligi elimizde demalmaı, shetelge shyǵyp demalýdy qalaıdy. Sebebi qyzmet kórsetý sapasy sheteldik demalys oryndarynda joǵary. Sharýa qojalyqtaryna týrısterge qyzmet kórsetý úshin qonaq úıler men glempıngter salýǵa, týrısterdi ekologııalyq taza tamaqpen qamtamasyz etýge jaǵdaı jasaý fermerlerdiń tabysyn kóbeıtip qana qoımaı, jańa jumys oryndarynyń ashylýyna, týrızmdi damytýǵa oń áser eter edi», - dedi senator.
«Sondyqtan týrızmdi ekonomıkanyń tolyqqandy draıverine aınaldyrýǵa naqty jaǵdaı jasaıtyn, elimizdiń týrıstik áleýetin tolyq paıdalanýǵa baǵyttalǵan, ásem tabıǵatymyzdy álemge áserli etip jetkize alatyn, demalys aımaqtaryn tıisti ınfraqurylymmen qamtamasyz ete alatyn jańa memlekettik baǵdarlama ázirleý usynylyp otyr», - dep túıindedi Sultan Dúısembınov.
