Qazaqstanǵa qaı elderden eńbek mıgranttary kóp keledi
ASTANA. KAZINFORM - 2025 jylǵy 1 qazandaǵy jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 14 666 shetel azamaty eńbek etedi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Baspasóz qyzmetiniń málimetterine qaraǵanda, shetel jumys kúshin (budan ári – ShJK) tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 561 ruqsat (birinshi sanat), qurylymdyq bólimshelerdiń basshylary úshin 2 280 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 3 884 jáne 988 adam. Sondaı-aq maýsymdyq jumystarǵa 3 036 adam, al korporatıvtik aýystyrý aıasynda 3 918 adam tartyldy.
Qazirgi ýaqytta Qazaqstanda ShJK paıdalanatyn 1 896 jumys berýshi bar. Olarda 339,1 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96%-y.
Ekonomıkalyq qyzmet túrleri boıynsha eń kóp jumys isteıtinder: qurylys salasynda – 4 799 adam, aýyl, orman jáne balyq sharýashylyǵy – 3 065 adam, taý-ken ónerkásibi jáne karerlerdi qazý – 1 187 adam, óńdeý ónerkásibi – 1 085 adam.
Eńbek mıgranttary keletin negizgi elder: Qytaı – 5 330 adam, Ózbekstan – 2 682 adam, Túrkııa – 1 046 adam, Úndistan – 1 012 adam.
Іshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıtinin jáne bóletinin esterińizge salamyz. 2025 jyly jalpy kvota respýblıkadaǵy jumys kúshiniń sanyna qatysty 0,2% mólsherinde nemese 14,8 myń birlik bolyp belgilengen, al osy jyldyń naýryz aıynan bastap jergilikti atqarýshy organdardyń ótinimderine baılanysty mınıstrdiń buıryǵymen 16,5 myń birlikke deıin ulǵaıtyldy.
-Bıylǵy tamyzdan bastap maýsymdyq sheteldik jumysshylardyń eńbek qyzmetin júzege asyrý úshin kásipter tizbesiniń keńeıýine baılanysty mınıstrdiń buıryǵymen jalpy kvota respýblıkadaǵy jumys kúshi sanyna qatysty 0,25% nemese 19,4 myń birlik mólsherinde belgilendi,-delingen habarlamada.
Osyǵan deıin elimizde 4–5 jastaǵy balalardy eńbekke baýlý jobasy bastaý alǵany týraly jazdyq.