Qazaqstanǵa qandaı áskerı tehnıkalar satyp alyndy

NUR-SULTAN. QazAqparat – QR Qorǵanys mınıstri Nurlan Ermekbaev Qarýly Kúshterdi jańa qarýmen jáne áskerı tehnıkamen jabdyqtaý jumystary týraly aıtyp berdi, dep habarlaıdy QazAqparat tilshisi.

«Bıyl 370-ten astam áskerı tehnıka satyp alyndy, 200-den astamy kúrdeli jóndeýden ótti jáne jańartyldy. Alǵash ret Qazaqstannyń Qarýly Kúshterine «Býk» zenıttik-zymyran keshenderi kelip tústi. Odan basqa, tómen nysandardy anyqtaıtyn «Rosa» radıolokatsııalyq stantsııalar alyndy. Otandyq óndiristen «Nur» radıolokatsııalyq stantsııalary alynyp jatyr», - dedi Nurlan Ermekbaev Ortalyq kommýnıkatsııalar qyzmetinde ótken brıfıngte.

Artıllerııalyq barlaýdy damytý úshin «Platforma» jyljymaly nysandardy barlaý jáne kontrbatareıalyq kúres radıolokatsııalyq stantsııasy qabyldandy. Mınıstr osyndaı quraldarmen jabdyqtaý protsesi jalǵasatynyn aıtty.

«Áskerimizge zamanaýı Sý-30SM ushaqtary, Mı-35 tikushaqtary, barlaýǵa arnalǵan ushqyshsyz ushý apparattary da túsip jatyr. Áskerı tehnıkany jańartý úshin Qorǵanys mınıstrligi elde qarý-jaraqtyń keıbir jańa túrlerin óndirý bastamasyn kóterdi», - deıdi mınıstr.

Sonymen birge, mınıstr áskerı oqý oryndary robot tehnıkasy men radıoelektrondy urysqa basymdyq berip, ǵylymı zertteýler júrgizetinin aıtty.

«Áskerı mamandar dronǵa qarsy qarý jáne ushqyshsyz ushatyn apparattardy ázirledi. Biregeı áskerı-ǵylymı vzvod quryldy. Mysaly, olar qujattardy berýdiń avtomattandyrylǵan júıesin ázirledi. Bul memlekettik qyzmet kórsetý kezindegi shyǵyndar men bıýrokratııalyq rásimderdi qysqartady», - dep atap ótti Nurlan Ermekbaev.