Qazaqstandyqtarǵa byltyr 2,5 trln teńge zeınetaqy tólendi

NUR-SULTAN. QazAqparat - 2020 jylǵy qańtar-jeltoqsan aılarynda respýblıkalyq bıýdjetten 772,3 mlrd teńge bazalyq zeınetaqy jáne 1 721,5 mlrd teńge yntymaqty zeınetaqy tólendi, dep habarlaıdy QazAqparat.

QR Eńbek jáne halyqty áleýmettik qorǵaý mınıstrliginen málim etkendeı, 2021 jylǵy 1 qańtardaǵy jaǵdaı boıynsha elimizde zeınetkerler sany 2 mln 247 myń adamdy quraıdy.

Aıta keteıik, 2018 jylǵy 1 shildeden bastap memlekettik bazalyq zeınetaqy tólemi, ár azamattyń zeınetaqy júıesine qatysý ótilin eskere otyryp taǵaıyndalady.

Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder (MZJ) zeınetaqy júıesindegi eńbek ótiline qosylady.

Sonymen, eger zeınetaqy júıesindegi jumys ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54% quraıdy, sodan keıin 10 jyldan asqan ár jyl úshin onyń mólsheri 2% artady. Mysaly, eger qatysý ótili 20 jyl bolsa, bazalyq zeınetaqy eń tómen kúnkóris deńgeıiniń 74%, 30 jyl – eń tómen kúnkóris deńgeıiniń 94% quraıdy. Jumys ótili 33 jáne odan da kóp jyl bolsa, eń tómen kúnkóris deńgeıiniń 100% mólsherinde belgilenedi.

Eger bir aı ishinde MZJ birneshe ret Biryńǵaı jınaqtaýshy zeınetaqy qoryna jasalsa, jınaqtaýshy júıege qatysý merzimi bir aıdy quraıdy.

Osylaısha, mindetti zeınetaqy jarnalary neǵurlym turaqty jáne tolyq salynatyn bolsa, zeınetaqy jasyna jetkende bazalyq zeınetaqy tólemderiniń mólsheri soǵurlym kóp bolady.

Óz kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńde alynǵan ortasha aılyq tabysqa baılanysty bolady.