Qazaqstandyqtarǵa arnalǵan ınsýlın nege Ózbekstannan shyqty - mınıstrliktiń jaýaby
Onyń aıtýynsha, QR Densaýlyq saqtaý mınıstrligi ótken jyldyń sońynda QR Syrtqy ister mınıstrligi arqyly kórshi eldiń áriptesterine osyndaı jaǵdaı týraly habar berýdi suraǵan. Alaıda shekaradan ondaı aqparat kelmegen.
«Insýlınder biryńǵaı dıstrıbıýtor (SK-Farmatsııa) arqyly satyp alynyp, Qazaqstannyń tikeleı medıtsınalyq uıymdaryna kelip túsedi. Ol jerde ınsýlınder retsept retinde jazylyp, patsıentterdiń qolyna tapsyrylady. Ótken jyly biz bólshek saýda jelisinde biryńǵaı dıstrıbıýtor arqyly alynǵan osyndaı preparattardyń satylý jaǵdaılaryn anyqtaǵan bolatynbyz. Bul faktiler týraly quqyq qorǵaý organdaryna da habar berdik. Biz patsıentterdiń sol preparatty alǵanynan nemese basqa jerge (Ózbekstandaǵy dárihanalarǵa) satqanynan habarymyz joq. Bolmasa ol preparattar syzylyp tastalyp, medıtsınalyq uıymdardan alynyp ketken. Basqa organdar men prokýratýra naqty osy istiń mán-jaıyn anyqtaý ústinde», - dedi tilshilerge Lıýdmıla Bıýrabekova.
Onyń sózine sensek, ótken jyly atalmysh preparattar boıynsha jetispeýshilik sezilgenimen, dál qazir dárilik preparattyń artylyp qalǵany belgili bolyp otyr. Al Lıýdmıla Bıýrabekovanyń orynbasary Nurlybek Asylbekovtyń aıtýynsha, 2018 jyly Densaýlyq saqtaý mınıstrligi atalmysh dárilik preparattardyń jetpeı qalǵanyna baılanysty arnaıy monıtorıng te júrgizgen.
«Ol monıtorıng boıynsha 50 medıtsınalyq uıym men 8 myńǵa tarta patsıent qamtylǵan edi. Aqyrynda, 149 patsıent preparatty almaǵanyn aıtty. Biz osy másele boıynsha Bas prokýratýraǵa hat joldadyq. Ótken jyldyń tamyz aıynan beri tekserý jumystary júrgizilip jatyr. Ázirge nátıje joq. Aldymen tekserý aıaǵyna deıin jetýi tıis», - deıdi Nurlybek Asylbekov.
QR Densaýlyq saqtaý mınıstrliginiń málimeti boıynsha, 2018 jyly ambýlatorııalyq satyp alý aıasynda rastvorlardy, shprıtsterdi satyp alýǵa 11 mlrd teńge jáne ınsýlın tabletkalaryn satyp alýǵa 4 mlrd teńge bólingen. Insýlınder týraly sóz qozǵaǵanda Densaýlyq saqtaý mınıstrliginiń ókilderi kórshiles eldegi dárihanalarda qazaq tilindegi markamen zańdy túrde paıda bolýy múmkin emes ekenin alǵa tartty.
Aıta ketsek, búgin osy másele boıynsha QR Bas prokýrorynyń orynbasary Andreı Lýkın pikir bildirgen bolatyn. Onyń aıtýyna qaraǵanda, qadaǵalaýshy organ jaǵdaıdy taldap, aqparat rastalǵan jaǵdaıda tıisti shara qabyldaıdy.
Esterińizge sala keteıik, budan buryn BAQ-ta Qazaqstan azamattaryna arnalǵan ınsýlın Ózbekstanda satylyp jatqandyǵy týraly aqparat taraǵan bolatyn.