Qazaqstandyqtardyń zeınetaqy jınaqtarynyń ınvestıtsııalyq tabystary naryq konıýnktýrasyna táýeldi - BJZQ

ALMATY. QazAqparat - Qazaqstandyqtardyń zeınetaqy jınaqtarynyń ınvestıtsııalyq tabysy salymshylar arasynda qalaı úlestiriletini jaıly «BJZQ» AQ basqarma tóraıymy Nurbúbi Naýryzbaeva aıtyp berdi, dep habarlaıdy «QazAqparat» tilshisi.

«Investıtsııalyq tabys salymshylardyń shotyna avtomatty túrde aýdarylady. Valıýta baǵamdary esepke alyna otyryp barlyq qarjy quraldaryn avtomatty túrde qaıta baǵalaý kúndelikti júrgizilip otyrady. Osylaısha shartty zeınetaqy birliginiń quny anyqtalady. Eger salymshy kúndelikti úzindi kóshirme alyp otyrsa, bir kúni tabysy artqanyn, kelesi kúni tómendegenin ańǵarady. Onyń bári naryq jaǵdaıyna baılanysty», - dep túsindirdi Nurbúbi Naýryzbaeva.

BJZQ málimetterine súıensek, 2017 jyldyń alǵashqy úsh aıynda taza ınvestıtsııalyq tabys somasy 51,5 mlrd teńgeni quraǵan. «2017 jyldyń qańtar-naýryz aılarynda BJZQ-dan tólengen tólem somasy 77 mlrd teńgeni qurady. Onyń ishinde, saqtandyrý uıymdaryna aýdarymdar 6 mlrd teńge boldy. Qazaqstandyqtardyń jınaqtarynyń jalpy somasy 6,69 trln teńgeni qurady, onyń 1,35 trln teńgesi - ınvestıtsııalyq tabys», - dep habarlady N. Naýryzbaeva.