Qazaqstandyqtardyń teńgemen saqtaǵan salymdary arta tústi

NUR-SULTAN. QazAqparat – Ulttyq bank tóraǵasy Erbolat Dosaevtyń sózine sensek, Qazaqstandaǵy depozıtterdi dollarlandyrý deńgeıi 48,4 paıyzdan 43,8 paıyzǵa tómendegen, dep habarlaıdy QazAqparat tilshisi.

«Depozıt kólemi tamyz aıynyń sońynda 5,5 paıyzǵa, ıaǵnı 17,5 trln teńgege tómendedi. Bul osy jyldyń birinshi toqsanynda bankterdi qalypqa keltirý isine baılanysty. Osy jyldyń sáýir-tamyz aılarynda depozıtter ósimi 1,9 paıyzdy kórsetip, 327 mlrd teńgege jetti», - dedi Erbolat Dosaev Úkimet otyrysynda.

Ulttyq bank tóraǵasynyń aıtýyna qaraǵanda, shetel valıýtasyndaǵy salymdardy teńgege aýystyrý jumysy jalǵasady.

«8 aıda ulttyq valıýtadaǵy salymdar 3 paıyzǵa ósti. Al valıýtalyq depozıtter 14,5 paıyzǵa tómendedi. Osynyń nátıjesinde depozıtterdi dollarlandyrý deńgeıi jyl basyndaǵy 48,4 paıyzdan 43,8 paıyzǵa tómendedi», - dedi ol.

Erbolat Dosaev atap ótkendeı, bıylǵy sáýir-tamyz aralyǵynda nesıe portfeli 13,2 trln teńgege, ıaǵnı 6 paıyzǵa ósken.

«Bul baǵyttaǵy ósim jyl basynan beri 1 paıyz boldy. Bul eń aldymen jeke tulǵalardyń nesıe portfeliniń 16 paıyzǵa, ıaǵnı 6,2 trln teńgege ulǵaıýymen tikeleı baılanysty. Zańdy tulǵalarǵa berilgen nesıe kólemi 9,2 paıyzǵa – 7,1 trln teńgege deıin tómendedi», - dedi ol.

Eske sala ketsek, Ulttyq bank tóraǵasy búgingi Úkimet otyrysynda Qazaqstannyń qarjy naryǵyndaǵy jaǵdaı turaqty ekenin málim etken bolatyn.