Qazaqstandyqtardyń aınalymyndaǵy kredıt kartalarynyń sany 1,5 ese artty
Qyrkúıekte elimizde aınalymda júrgen tólem kartalarynyń sany 42,7 mln-ǵa jetti. Bul bir jyl burynǵy kórsetkishten 41,8 paıyzǵa kóp. Jyl ishinde kredıt kartalary birden 50,8 paıyzǵa artyp, 8,2 mln dana boldy. Aınalymdaǵy jalpy kartalardyń ishinde kredıt kartalarynyń úlesi qazirgi ýaqytta 19,2 paıyzǵa jetti. Al bir jyl buryn olardyń úlesi 18, 5 jyl buryn 16,1, al 2011 jyldyń tamyzynda 10,8 paıyz bolatyn.
Kredıt kartalarynyń ózgeshe nusqalarynyń biri bólip tóleý kartasy dep atalady. Mundaı kartalar artyq tólemsiz belgili bir kezeńde, belgili bir komıssııamen satyp alǵan taýardyń qunyn bólip tóleýge múmkindik beredi. Elimizde qazirgi ýaqytta bólip tóleý kartasyn 9 bank usynyp otyr. Buǵan qosa ekinshi deńgeıli 3 bank - Jýsan Bank, Sberbank jáne Hoým Kredıt bank qarjy ınstıtýtynyń seriktestik jelilerine qaramastan álemniń kez kelgen elindegi saýda núktesinde kartalarymen satyp alǵan taýardyń qunyn bólip tóleýge múmkindik usynady.
Jýsan Bank pen Sberbank 3 aıǵa «taza» bólip tóleýmen jumys isteıdi. Al odan keıin komıssııa alynady. Tólem merzimi ótip ketken jaǵdaıda Jýsan Bank bólip tólenetin somaǵa baılanysty aıyna 490-nan 4 990 teńgege deıin komıssııa alady. Al Sberbank komıssııasy bólim tóleý merzimine, satyp alynǵan taýardyń somasyna baılanysty 7,5 paıyzdan 30 paıyzǵa deıin aýytqyp otyrady.
Hoým Kredıt banki búkil álem boıynsha 5 aıǵa, seriktestik jelilerinde 12 aıǵa «taza» bólip tóleýdi usynady. Degenmen, bólip tóleý kartasy qoldanysta bolǵan kezde ony paıdalaný úshin aı saıyn 499 teńge tóleý kerek.
Jýsan Bank mundaı kartalarǵa alǵashqy 2 jyl tegin qyzmet kórsetedi, odan keıin aıyna 50 teńge tólenedi. Al Sberbankta tek birinshi jyl tegin. Ekinshi jyldan bastap aıyna 210 teńge tóleýge týra keledi.
Kaspi Bank 3 aıǵa, ForteBank pen Kassa Nova banki 4 aıǵa ózderiniń seriktestik jelilerinen taýardy 3 aıǵa bólip tóleýge múmkindik beredi. Tsentr Kredıt bank, Eýrazııalyq bank jáne Halyq bank seriktestik jelilerinde «taza» bólip tóleýdi usynady. Qalǵan jelilerden satyp alynǵan taýar úshin komıssııa tóleýge týra keledi. Tsentr Kredıt bank, Eýrazııalyq bank jáne ForteBank kartalaryn olardyń jaramdylyq merzimi aıaqtalǵanǵa deıin tegin paıdalanýǵa bolady.
