Qazaqstandyqtar jyl basynan beri 13 myń altyn quıma satyp alǵan

NUR-SULTAN. QazAqparat - 2020 jyldyń qańtarynan qyrkúıegine deıingi kezeńde jalpy el turǵyndary ekinshi deńgeıli bankterden jáne aıyrbastaý pýnktilerinen jalpy salmaǵy 566,3 kg bolatyn 13 208 ólsheýish quımany satyp aldy. Qyrkúıek aıynda jalpy salmaǵy 65,2 kg bolatyn 1 480 ólsheýish quıma satyldy, dep habarlaıdy QazAqparat.

Ulttyq banktiń málimetinshe, altyn quıma bes túrde usynylǵan: 5, 10, 20, 50 jáne 100 g.

Satyp alýshylar arasynda salmaǵy 10 g quıma eń kóp satyp alynady. Satýdyń jalpy kóleminen onyń úlesi 25% – 8 701 dana. Odan keıin 100 gramdyq – 7 648 dana (22%), 5 gramdyq – 6 414 dana (19%), 20 gramdyq – 7 649 dana (22%), 50 gramdyq – 4 276 dana (12%) tur.

Quıma satyp alý boıynsha óńirler arasynda kóshbasshy – Almaty qalasy (satylǵan quımalardyń jalpy sanynan 55%), odan keıin Atyraý (14%), Nur-Sultan (10%) jáne basqa óńirler (21%) boldy.

Baǵdarlama iske qosylǵan sátten bastap jalpy salmaǵy 3,2 kg 119 ólsheýish quıma keri satyp alýǵa qabyldandy. Bul altyn quımalardyń ınvestıtsııalaýdyń jáne jınaqty jınaqtaýdyń uzaq merzimdi quraly bolyp tabylatyndyǵyna baılanysty.

Altyn quıma – ınvestıtsııalaýdyń senimdi quraly. Bankterdiń jáne banktik emes aıyrbastaý pýnkteriniń klıentke «sol kúni» aqsha tóleı otyryp, quımalardy keri satyp alý múmkindigi – altyn quımalary naryǵynyń ótimdiligin qamtamasyz etýdiń negizgi faktory.

Árbir quıma qorǵanysh elementterimen (quımalardyń bet jaǵy aınadaı, mıkromátin jáne bederli gýrt) jáne quımalardy mehanıkalyq zaqymdanýdan qorǵaıtyn jáne oraýy ashylǵanyn nemese ashylmaǵanyn tez anyqtaýǵa múmkindik beretin arnaıy oraýda shyǵarylatynyn eskertemiz.

Qorǵanysh oraýy da quıma sapasynyń sertıfıkaty bolyp tabylady. Sondyqtan quımany uqypty saqtaý jáne oraýdy ashpaý usynylady.

Qazaqstan Respýblıkasynyń Ulttyq Banki halyq úshin tazartylǵan altynnyń ólshemdik quımalaryn satý jáne keri satyp alý Baǵdarlamasyn 2017 jyly iske qosty. Barlyǵy 2017 jyldan bastap jalpy salmaǵy 1,25 t quraıtyn 34 688 ólsheýish quıma satyldy.

Qazirgi kezde altyn quımalaryn Halyk Bank-ten, Eýrazııalyq Bankten, Jýsan Bank-ten, Bank TsentrKredıtten, sondaı-aq banktik emes aıyrbastaý pýnktterinen satyp alýǵa jáne olarǵa keri satýǵa bolady.