Qazaqstandyqtar Ortalyq Azııa elderiniń kınologııalyq qyzmetteriniń І chempıonatynda top jardy

ASTANA. 5 maýsym. QazAqparat - Ortalyq Azııa elderi kınologııalyq qyzmetteriniń kınolog mamandary arasyndaǵy kópsaıys boıynsha І chempıonat óz máresine jetti. Bes kúnge sozylǵan bul chempıonatqa kınolog mamandar qyzmettik-izdeý ıtterimen birge qatysqan.

Іs-shara alǵash ret QR Qarjy mınıstrligi Shekaralyq baqylaý komıteti Kınologııalyq ortalyǵynyń bazasynda komandalyq jáne jeke birinshilikte ótkizildi, dep habarlaıdy UQK Shekaralyq qyzmetiniń baspasóz qyzmeti.

Chempıonatqa ózderiniń tórt aıaqty serikterimen birge Qazaqstan, Qyrǵyzstan, Tájikstan, Túrikmenstan men Ózbekstan elderiniń mamandary qatysty.

Ár qatysýshy memleketten eki jup usynyldy. Bul saıysqa jaýynger-shekarashylar da belsendi qatysty. Jeńis úshin kúreste bes kezeńnen ótý kerek boldy, jalpy esep boıynsha komandalyq birinshilikte qazaqstandyq kınologtar 568 upaı jınap, birinshi oryndy ıelendi. Ekinshi oryndy 550 upaı jınaǵan Qyrǵyzstan alsa, Túrikmenstan eliniń kınolog mamandary 493 upaı jınap, úshinshi oryndy qanaǵat tutty.

Jekeleı synda jaýynger-shekarashy praporşık Baqytjan Myrzahmetov pen onyń tórt aıaqty dosy úshinshi oryn aldy.

Kezdesý men óz salasynda úzdik bolý quqyǵy úshin adal kúrespen ótken bul saıys ózara yntymaqtastyqty nyǵaıtyp qana qoımaı, qatysýshylardyń bir-birimen aqparat pen tájirıbe almasýlaryna múmkindik berdi.