Qazaqstandyqtar Ońtústik Koreıada vızasyz 30 kúnge deıin júre alady
30 kúnge qazaqstandyq týrıst retinde, jumys babymen, emdelýge, jeke isi boıynsha bara alatyn boldy.
«Qazaqstan Respýblıkasynyń Úkimeti men Koreıa Respýblıkasynyń Úkimeti arasyndaǵy vızalyq talaptardy ózara joıý týraly Kelisimge sáıkes, 2014 jyldyń qarasha aıynan bastap jaramdy jol júrý qujattary (shetel pasporty) bar QR azamattary Koreıa Respýblıkasyna kelý úshin aldyn ala vıza alýdan bosatylyp, onda 30 táýlikke deıingi merzimde bola alady», delingen habarlamada.
Osylaısha, Ońtústik Koreıaǵa baǵyt alǵan QR-nyń azamattary ońtústik koreıalyq vızasyz 30 kúnge deıin týrısttik maqsatpen, jumys maqsatymen, saýyǵý jáne emdelý maqsatymen, mádenı-aǵartýshylyq maqsatymen, jeke isimen (týysqandaryna, dostaryna jáne tanystaryna barý) shyǵa alady.
Sonymen birge osy kelisimniń erejeleri Koreıaǵa jumysqa turý, oqýǵa barý, turaqty mekendeý, mıssıonerlik maqsarmen baǵyt alǵan tulǵalarǵa tıesili emes.
Bul jaǵdaıda Qazaqstannan Koreıa Respýblıkasyna shyǵý aldynda aldyn ala Astanadaǵy Koreıa Respýblıkasynyń Elshiliginde nemese Almatydaǵy Bas konsýldyǵynda ońtústikkoreıalyq tıisti kategorııasy bar vızany jasaýy qajet. Keri jaǵdaıda, Koreıa Respýblıkasynyń kóshi-qon ókimeti sizge kirýge ruqsat bermeı, ońtústikkoreıalyq zańnamaǵa sáıkes deportatsııa rejımin qoldana alady.
Ońtústikkoreıalyq kóshi-qon qyzmetiniń qyzmetkerleri óz eliniń zańnamasyna sáıkes kirý kezinde árbir shetel azamatty sapar maqsatynyń naqty nıetimen sáıkestigin tekserý úshin saýalnama júrgizýge quqyly.
«Osyǵan baılanysty, Ońtústik Koreıaǵa baratyn azamattar sapar maqsatyna qaramastan qaıtý bıletiniń bolýyn, Ońtústik Koreıadaǵy tıisti tulǵanyń nemese uıymnyń (seriktes kompanııa, týragenttigi, medıtsınalyq mekeme jáne t.b.) shaqyrý kóshirmesiniń bolýyn, kóshi-qon kartasynda (halyqaralyq aerooportta kelgen kezinde toltyrylady) sapar maqsatyn, Koreıa Respýblıkasynda turatyn ýaqytsha mekenjaıdy jáne siz bara jatqan tulǵanyń/uıymynyń aty-jónin, ataýyn jáne baılanys aqparatyn anyq kórsetýdi qadala suraımyz», dep habarlaıdy QR SІM.
Mınıstrlik sonymen qatar, shyǵatyndardyń barlyǵyna medıtsınalyq saqtandyrýdy sol elge attanar aldynda jasaýǵa keńes beredi, óıtkeni tegin medıtsınalyq kómek qyzmeti bul elde qarastyrylmaǵan.
