Qazaqstandyqtar qandaı kólik markalaryn jıi satyp alady
«QazAvtoÓnerkásip» Qazaqstannyń avtomobıl salasy kásiporyndary odaǵynyń málimetinshe, qańtar-qazanda elimizdiń aýmaǵynda jalpy quny 460,9 mlrd teńge bolatyn 61 796 avtokólik quraly (jeńil, júk kóligi, avtobýs tehnıkasy, arnaýly mashınalar men tirkemeler) qurastyryldy. Shyǵarylǵan ónim kólemi naqty mánde ótken jylǵy kórsetkishten 58,4 paıyzǵa asyp tústi.
Jeńil avtomobıl qurastyrý 51,5 paıyzǵa artyp, 51 922-ge jetti. Avtobýs shyǵarý da 67,4 paıyz ósip, esepti kezeńde 1 525 kólik qurastyryldy. Sonymen qatar 6 299 júk kóligi, 284 mamandandyrylǵan avtotehnıka jáne 1 766 tirkeme shyǵaryldy.
2020 jyldyń qazanynda qazaqstandyq kásiporyndardyń konveıerinen 11 140 avtokólik quraly qurastyryldy. Bul, 2019 jylǵy kórsetkishten 2 ese joǵary. Sonymen qatar qyrkúıekpen salystyrǵanda qazanda avtokólik óndirisi 1,6 ese ósti.
Jyl basynan beri otandyq avtozaýyttar 52 988 kólik satty. Bul ótken jylǵy kórsetkishten 53,7 paıyzǵa kóp. 2020 jyldyń 10 aıynda Qazaqstanyń avtoónerkásip kásiporyndarynyń naryqtaǵy úlesi 72,2 paıyzǵa jetti.
Respýblıka turǵyndarynyń jergilikti óndiristen shyqqan avtomobılderdi satyp alýǵa shyǵystary 404,5 mlrd teńgege jetip, bir jyl burynǵy kórsetishten 82,1 paıyz asyp tústi.
Esepti kezeńde Qazaqstanda qurastyrylǵan jeńil kólikterdiń arasynda Lada (15089), Hyundai (13455), Ravon (5726), Chevrolet (5636) jáne KIA (4922) markalaryna suranys joǵary boldy. Sonymen qatar otandyq kásiporyndar usynatyn kólik markalarynyń tizimine JAC (1527), UAZ (538) jáne Skoda (249) kirdi.
Eń kóp satylǵan kólik markalary qatarynda Lada Granta (6634), Ravon Nexia R3 (5726), Hyundai Tucson (3795), Lada Vesta (3531) jáne Hyundai Accent (3443) bar. Munan bólek, qazaqstandyq tanymal modelder qataryn Chevrolet Cobalt (2905), Lada 4x4 (2705), KIA Rio (2684), Hyundai Creta (2561) jáne Lada Largus (1865) tolyqtyrady.
Aıta keterligi osy jyldyń qańtar-qazanynda 7 362 avtomobıldi jeńildetilgen avtokredıt memlekettik baǵdarlamasyna qatysýshylar satyp aldy.
