Qazaqstandyqtar Batýmıdegi qymbat qonaq úıden shyǵarylýda
Sot qaýlysyna baılanysty 300-ge tarta demalýshy búginge deıin tólenip qoıǵan nómirlerin tastap shyǵýǵa májbúr bolyp otyr. Otelde órt qaýipsizdigi erejeleri saqtalmaǵan. Tótenshe jaǵdaılar qyzmetkerleri munyń sońy ótken jyly tirkelgen qaıǵyly oqıǵaǵa uqsas jaǵdaıǵa ákelip soqtyrýy múmkin dep eskertýde. Ol kezde órt saldarynan 11 adam mert bolǵan edi.
Sot qaýlysyna sáıkes oteldiń jumysy belgili bir merzimge deıin toqtatylǵan. Qonaq úıge turaqtaǵandar men qyzmet kórsetýshi personal júkterin jınaýda.
«Ne bolyp jatqany túsiniksiz. Qonaq úıden nege ketýimiz kerek? Biz bes kúnge nómir jaldap qoıǵan edik. Nelikten bizdi shyǵaryp jibergenin túsingen joqpyz. Aıtýlarynsha, bári de bizdiń qaýipsizdigimiz úshin jasalyp jatqan kórinedi. Bizdi qaıda aparyp ornalastyratyndary belgisiz. Qalaı bolǵanda da, osy keshke deıin qonaq úıdi bosatý kerektigimiz aıtyldy», - deıdi otelde ornalasqandardyń biri.
Sarapshylardyń qorytyndysyna sáıkes, oteldiń jabylýynyń basty sebebi - tútindi alastaý júıesiniń bolmaýy. Mine, sondyqtan, órt týyndaǵan jaǵdaıda otelge turaqtaǵandardyń ómirine qaýip tóneri anyq. Byltyr 24 qarashada osy másele eskerilmegendikten, qaıǵyly jaǵdaı tirkelgen.
«Biz qonaq úı ıelerimen shuǵyl jumysty bastadyq. Máseleni sheshýge barynsha daıyn ekenimizdi bildirip otyrmyz: belgili bir merzim men qajetti aqyl-keńes beremiz. Demalýshylar men personaldyń ómirine tónip turǵan qaýiptiń mólsheri bir paıyz bolsa da, qonaq úı jumysyn jalǵastyra almaıdy», - deıdi TJ boıynsha qyzmettiń ókili Maısýradze.
Qonaq úıdiń ákimshiligi sot sheshimi týraly shilde aıynan beri habardar bolyp shyqty. Alaıda menedjerler klıentterdi qabyldaýdy toqtatpaǵan. Týyndaǵan máselege Týrızm departamenti de aralasqan. Atalmysh departamenttiń qyzmetkerleri demalýshylardy basqa qonaq úılerge ornalastyrý úshin barlyq jaǵdaıdy jasap jatyr. Olardyń aıtýynsha, qolǵa alynǵan sharalardyń barlyǵy demalýshylardyń qamy úshin jasalyp jatqandyqtan, tirkelgen jaǵdaı eldiń týrıstik ımıdjine eshqandaı áserin tıgizbeıdi.