Qazaqstandyqtar aǵylshyn tili men SMM negizderin úırenýge úlken qyzyǵýshylyq tanytýda
Qazirdiń ózinde 74 myńǵa jýyq adam Coursera jappaı onlaın-bilim berýdiń jetekshi alańynda tegin onlaın oqýdan ótýge ótinim berdi. Qazaqstandyqtar aǵylshyn tili men bıznes-aǵylshyn tilin, Python baǵdarlamalaý negizderin jáne SMM negizderin úırenýge úlken qyzyǵýshylyq tanytty.
Álemdegi eń tanymal Coursera onlaın-oqytý platformasy QR Eńbek jáne halyqty áleýmettik qorǵaý mınıstrligimen jáne «Eńbek resýrstaryn damytý ortalyǵy» AQ-men birlesip qazaqstandyqtar úshin tegin onlaın-bilim berýdiń aýqymdy jobasyn iske asyrýda. Joba 31 qazanǵa deıin eseptelgen, alaıda uıymdastyrýshylar arasynda kýrstarǵa tirkelý merzimin 2020 jylǵy 14 jeltoqsanǵa deıin jáne oqý merzimin 2021 jylǵy 15 aqpanǵa deıin óteýsiz negizde uzartý týraly ýaǵdalastyqqa qol jetkizildi.
Búgingi tańda qazaqstandyqtardan 74 myń ótinim kelip tústi, 38 myń adam oqýdan óte bastady. Bul rette jobanyń tirkelgen 36 myńǵa jýyq qatysýshysy kýrstardan ótýge kirispedi.
Eńbekmıni ótinim bergen qazaqstandyqtardy Coursera alańynda oqýǵa kirisýge shaqyrady, sebebi bólingen oryndar sany shekteýli. Qazirgi ýaqytta 12 myń tegin lıtsenzııa qoljetimdi, olardy tirkelgen, biraq oqýdy bastamaǵan azamattar da, 14 jeltoqsanǵa deıin ótinim berip, unaǵan kýrstardy tańdap úlgergen kez kelgen qazaqstandyq ta paıdalana alady.
Búgingi tańda tirkelgen qazaqstandyqtar túrli baǵyttar boıynsha 131 myńnan astam kýrsty tańdap, 230 myń sabaqty ótti.
Bıznes salasy, IT jáne kompıýterlik ǵylymdar, tilderdi úırený, jeke damý jáne densaýlyq oqytýdyń eń suranysqa ıe baǵyttary bolyp tabylady.
«Aǵylshyn tilin jáne bıznes-aǵylshyn tilin úırený», «Python-daǵy baǵdarlamalaý negizderi» jáne «SMM negizderi» kýrstarynan basqa, tańdalǵan TOP-10 kýrstyń qataryna «Jobalarmen jumys jasaýdaǵy Agile jáne Scrum», «Ómirlik isti tabý negizderi», «Óz aqshańa bıznes ashý», «Rastrlyq grafıka. Adobe Photoshop CC», «Ótirik teorııasy. Profıldeý», «Fotosýret negizderi» jáne «HTML jáne CSS negizderi» kirdi.
Oqýdy aıaqtaǵan qazaqstandyqtar Coursera onlaın-oqytý platformasynda ótken kýrstardyń qorytyndysy boıynsha óz pikirlerin qaldyrady.
Mysaly, Irvaındaǵy Kalıfornııa ýnıversıtetiniń «Initiating and Planning Projects (Jobalarǵa bastamashylyq etý jáne olardy josparlaý)» kýrsyn ótken Uljan qolaıly da túsinikti formatta jańa bilim meńgerý múkindigi úshin rızashylyǵyn bildirdi.
«Jobany basqarýdan habarym onsha joq adam retinde men kýrs qoljetimdi aqparattan turady dep aıta alamyn. Internettegi oqytý sonshalyqty qyzyqty bolýy múmkin dep eshqashan oılamas edim. Maǵan bul kýrstan ótý unady, men ony basqalarǵa usynamyn», – deıdi ol.
Toronto ýnıversıtetiniń «Introduction to Psychology (Psıhologııaǵa kirispe)» kýrsynan ótken Jazıra: «Bul kýrs – men ótken eń jaqsy onlaın kýrstardyń biri. Ár apta men ózim úshin jańa bir nárse taptym, adamdar nege belgili bir jolmen áreket etetinin túsine bastadym jáne kóptegen suraqtaryna jaýap taptym. Rahmet!», – dep óz tájirıbesimen bólisti.
«Meniń bul kýrsqa jazylǵan sebebim: óz ómirimdi psıhologııamen baılanystyryp, muqtaj adamdarǵa kómekteskim keledi. Kýrs maǵan osy baǵyt týraly bilýge jáne mańyzdy oılardy túsinýge kómektesti. Adamdardy óz baǵyttarynda oqytqanyńyz úshin rahmet!» – deıdi Djons Hopkıns Ýnıversıtetiniń «Psychological First Aid (Alǵashqy psıhologııalyq kómek)» kýrsynan ótken Aıhanym.
Esterińizge sala keteıik, Coursera bilim berý platformasy álemniń jetekshi kompanııalary men ýnıversıtetterinen (GOOGLE, IBM, Facebook, Stanford University, Yale University, Johns Hopkins University, Princeton University jáne t.b.) 4 myńnan astam tegin kýrstardan ótýge biregeı múmkindik beredi. Atalǵan kýrstarda túrli daǵdylardy, sonyń ishinde matematıkalyq, kommýnıkatıvtik, kásipkerlik, baǵdarlamalaý, statıstıkalyq taldaý, derekterdi basqarý jáne kóshbasshylyq daǵdylaryn meńgerýge bolady.
Kýrstardy sátti aıaqtaǵannan keıin bilim alýshylar sertıfıkat alady.
Aǵymdaǵy jylǵy 14 jeltoqsanǵa deıin https://www.enbek.kz/ru/free-coursera Elektrondyq eńbek bırjasy arqyly ótinim bergender jáne www.coursera.org platformasynda tirkelgenin rastaǵandar úshin Coursera alańynda tegin oqytý kýrstary 2021 jylǵy 15 aqpanǵa deıin qoljetimdi.
