Qazaqstandyq jazýshy Taýfık Kárimov Halyqaralyq London syılyǵynyń laýreaty atandy

NUR-SULTAN. QazAqparat – Internatsıonaldyq Jazýshylar odaǵy (www.inwriter.ru) Halyqaralyq London syılyǵyna qatysty Ulybrıtanııa Jazýshylar odaǵymen birlesken besjyldyq jumystyń qorytyndysyn shyǵardy. Bul aýqymdy joba álemniń túkpir-túkpirindegi jazýshylarǵa óz shyǵarmalaryn halyqaralyq arenada usynýǵa, granttar men qurmetti ataqtarǵa ıe bolýǵa múmkindik berdi, dep habarlaıdy QazAqparat.

Internatsıonaldyq Jazýshylar odaǵynyń baspasóz qyzmetinen málim etkendeı, baıqaýǵa álemniń 15 elinen zamanaýı jáne daryndy avtorlar Aızek Adamson (AQSh), Melvın Berdjess (Ulybrıtanııa), Rıchard Glover (Aýstralııa), Ante Krog (OAR), Laımonas Tapınas (Lıtva), Sergeı Lýkıanenko (Reseı) jáne basqalary qatysty.

Halyqaralyq London syılyǵy kóptegen qatysýshyǵa alǵa qaraı úlken qadam jasaýǵa kómektesti. Syılyq alty nomınatsııaǵa bólindi jáne avtorlardyń kásibı dárejesine sáıkes birneshe kezeńnen jáne sanattardan turdy.

Long-paraqshaǵa engen avtorlar «Jyldyń úzdik avtory» ataǵyn aldy jáne «London syılyǵy jazýshyny usynady» («London Prize presents») serııasymen kitap shyǵarý múmkindigine ıe boldy.

Halyqaralyq London syılyǵyn uıymdastyrýshylardyń arqasynda ár eldiń 500-den astam aqyn-jazýshysy álemdik arenaǵa shyǵyp, ózin sheteldik aýdıtorııaǵa tanyta aldy.

Syılyq laýreattary Taýfık Kárimov (Qazaqstan), Den Braýn (AQSh), Orr Vendı (Aýstralııa), Daffı Kerol Enn (Ulybrıtanııa), Vıktorııa Levına (Izraıl), Lı Mı-ıÝng (Kanada), Pavel Gýbın (AQSh), Igonı Barrett (Nıgerııa), Han Gan (Ońtústik Koreıa), Lýna El (Frantsııa), Alısa Lıppart (Norvegııa), Oleg Shtelman (Lıtva), Sarııa Mammadova (Ázerbaıjan), Lıýbov Pıvnık (AQSh) jáne basqalary boldy.

Qazaqstandyq Taýfık Kárimov «Juldyzdar» atalymynda «Shaǵyn proza» nomınatsııasy boıynsha Charlz Dıkkens syılyǵynyń laýreaty boldy. Onyń baıqaýǵa qatysqan týyndysy – aǵylshyn jáne orys tilderinde jaryq kórgen «Fata Morgana» kitaby.

Aıta keteıik, T.Kárimov Sajıda Sýleımanova atyndaǵy ádebı syılyqtyń (Tatarstan Respýblıkasy) laýreaty, Týsson qalasynyń (AQSh) qurmetti azamaty.

Orys, qazaq, tatar jáne aǵylshyn tilderinde jaryq kórgen kitaptardyń avtory, sondaı-aq Qazaqstan, Internatsıonaldyq, Reseı, Tatarstan jáne Ázerbaıjan Jazýshylar odaqtarynyń múshesi. Qazirgi kezde Qazaqstan tatarlary men bashqurttarynyń kongresin basqarady. Budan bólek, Dúnıejúzilik tatarlar kongresi ulttyq keńesi tóraǵasynyń orynbasary.