Qazaqstandyq ýnıversıtet alǵash ret álemdik joǵary oqý oryndarynyń úzdik 300-digine kirdi

ASTANA. 11 qyrkúıek. QazAqparat - Joǵary oqý oryndary damýynyń sapalyq kórsetkishterin baǵalaý salasyndaǵy tanylǵan bedeldi QS reıtıngi agenttiginiń (Ulybrıtanııa) zertteýleri qorytyndysymen Ál-Farabı atyndaǵy Qazaq ulttyq ýnıversıteti álemniń 800 tańdaýly ýnıversıtetteriniń arasynda 299-shy orynǵa shyqty.

Úzdik 300-dikke TMD elderinen 3 joǵary oqý orny kirdi - olardyń arasynda QazUÝ-dan basqa, M.Lomonosov atyndaǵy Máskeý memlekettik ýnıversıteti men Sankt-Peterbor ýnıversıteti bar, dep habarlady ýnıversıtettiń baspasóz qyzmeti.

Eldiń jetekshi joǵary oqý orny álemdik reıtıngide tez ilgeri jyljý belsendi serpinin kórsetip otyr: sońǵy úsh jylda ýnıversıtet 350 pozıtsııada joǵary kóterildi. Mundaı eleýli tabysqa QazUÝ ujymy nátıjege baǵdarlanǵan keshendi qurylymdyq jańartý júrgizý, klasterlik turǵyda fakýltetterdi qalyptastyrý, kafedralardy irilendirý, basqarý júıesin engizý arqyly qol jetkizdi.

Halyqaralyq jetekshi sarapshylardyń pikirinshe, QazUÝ qyzmettiń barlyq baǵyttary boıynsha sapalyq kórsetkishterin eleýli jaqsartty. Ýnıversıtet tolyqtaı halyqaralyq standarttarǵa sáıkes keletin bilim baǵdarlamalaryna kóshti. Joǵary oqý ornynyń ǵalymdary ǵylymı zertteýlerdi belsendi júrgizýde, halyqaralyq deńgeıde ınnovatsııalyq jobalar júzege asyrylýda, jańa tehnologııalar qurylýda.

Jyl ótken saıyn ǵalymdardyń bedeldi basylymdarda jarııalanǵan ǵylymı jumystarynyń sany arta túsýde. Ýnıversıtet halyqaralyq yntymaqtastyqty keńeıtý, akademııalyq utqyrlyq, áleýmettik áriptestikti damytý salalarynda da oń serpinge ıe bolyp otyr. Jumys berýshiler arasynda joǵary oqý ornynyń tanymaldyǵy ósip keledi. Sonymen qatar QS reıtıngisinde QazUÝ-dyń akademııalyq ortadaǵy bedeli arta túskeni joǵary baǵalanǵan.

QazUÝ Memleket basshysy alǵan qoıǵan álemdik joǵary oqý oryndarynyń úzdikteri qataryna kirý, bilimge negizdelgen ekonomıkanyń belsendi sýbektisi bolý jónindegi tapsyrmalaryn oryndaýmen dáıekti jumys isteýde.