Qazaqstandyq stýdentter paıdalanylǵan ósimdik maıynan bıootyn jasap shyǵardy
Jas ǵalymdar Nazerke Halel men Mýnısa Saıdıǵanıevanyń jobasy halyqaralyq konferentsııada júldeli oryn aldy. Joba jetekshisi – QazUPÝ doktoranty Gúlsara Aqanova. Ol ekologııalyq taza bıootyn óndirýdiń biregeı tehnologııasyn jasaýmen birneshe jyl boıy aınalysyp keledi.
«Qazir kóptegen elder bıootynǵa kóship jatyr. Shetelde negizinen qant qamysy, júgeri sııaqty ártúrli ósimdikterden óndiredi. Biz bıootyn alý boıynsha óz tehnologııamyzdy oılap taptyq jáne jasadyq. Jyldam tamaqtaný meıramhanalarynda ósimdik maıy kóp mólsherde paıdalanylady jáne tamaq pisirgennen keıin ol jaramsyz bolyp qalady. Biz ony qaıta óńdeýdi usynamyz. Ol úshin ósimdik maıyn usaq qospalardan tazartamyz, sodan keıin siltili katalızatordy jáne etıl spırtin qosamyz. Osylaısha bıootyn alamyz», - deıdi basshy Gúlsara Aqanova.
Jas ǵalymdardyń jobasy birqatar ekologııalyq jáne ekonomıkalyq máselelerdi sheshedi. Bıootyn ekologııalyq taza jáne tıimdi, sonymen qatar arzan, qaýipsiz jáne tasymaldaýǵa yńǵaıly.
Paıdalanylǵan ósimdik maıynan bıootyn alý tehnologııasy jas ǵalymdar men stýdentterdiń «Farabı álemi» halyqaralyq konferentsııasynda úzdikterdiń biri dep tanyldy. Ázirge bul – Qazaq ulttyq qyzdar pedagogıkalyq ýnıversıteti stýdentteriniń alǵashqy ǵylymı jetistigi. Aldaǵy ýaqytta Nazerke Halel men Mýnısa Saıdıǵanıeva jobalaryn jetildirip, startap jobalarǵa qatysýdy josparlap otyr.
