Qazaqstandyq rels ónimderi Ózbekstanǵa eksporttalatyn boldy

ASTANA. QazAqparat - 16 qyrkúıekte Qazaqstan Respýblıkasynyń Prezıdenti N. Nazarbaevtyń Tashkentke resmı sapary barysynda 2-shi Qazaqstan-Ózbek bıznes forýmy ótkizilip, oǵan qazaqstandyq ónim óndirýshilerdiń taýarlary da qoıyldy. «QTJ» UK» AQ basshysy Qanat Alpysbaev bastaǵan delegatsııasy Tashkenttegi 2-shi Qazaqstan-Ózbekstan bıznes-forýmy aıasyndaǵy qazaqstandyq taýar óndirýshilerdiń kórmesine qatysty, dep habarlaıdy «Qazaqstan temir joly» UK» AQ-nyń baspasóz qyzmeti.

Kórmege Aqtóbe rels arqalyǵy zaýytynyń ónimderi, «Tulpar-Talgo» zaýytynyń jolaýshylar vagondary, teplovozdar men elektrovozdar qoıyldy. Tashkent temirjol stantsııasyna qazaqstandyq kórmege qatysýshylar teplovoz, elektrovoz, «Tulpar-Talgo» jolaýshylar vagondaryn ornalastyrdy.

Q. Alpysbaev Qazaqstanda temirjol kóligi mashınalary klasteri qalyptasqandyǵy týraly baıandady.

«Memleket basshysynyń tapsyrmasymen Indýstrııalyq-ınnovatsııalyq damýdyń memlekettik baǵdarlamasy aıasynda temirjol kóligi mashınalary klasteri qalyptasty»,-dep atap ótti Q. Alpysbaev.

Onyń aıtýynsha, «Kompanııa mashına jasaý salasyndaǵy álemdik - «General Electric», «Alstom», «Patentes Talgo S.L.», «SIEMENS» sekildi jetekshi kompanııalarmen sońǵy úlgidegi jyljymaly quramdy qurastyrýda ozyq ınnovatsııalyq tehnologııalardy qoldanýda».

Qazirgi tańda qazaqstandyq kásiporyndar júk jáne jolaýshylar teplovozdaryn, elektrovozdaryn, jolaýshylar jáne júk vagondaryn shyǵarady. Joldyń ústińgi qabatyna qajetti materıaldardy óndiredi.

Qazaqstandyq kásiporyndardan shyqqan temirjol kólikteri eksporttyq suranysqa ıe. Saraptaýlardyń qorytyndysyna qaraǵanda, jalpy kólemi 3 mlrd AQSh dollar bolatyn ónimder 18 memleketke ótkizilýde. Temirjol kóligi ónimderi kórshiles memleketter Ózbekstan, Túrkmenstan, Tájikstan, Qyrǵyzstan, Ázirbaıjan, Ýkraınaǵa eksporttaldy.

Ásirese, Qazaqstan men Ózbekstan arasyndaǵy temirjol kólikteriniń bólshekterin óndirý salasyndaǵy seriktestiktiń qarqyny joǵary. Qazirgi tańda ózbek temirjolyna Almalyq taý ken metallýrgııalyq ónimderiniń 1 myń tonnasy, Aqtóbe rels arqalyǵy zaýytynyń 3,9 myń tonna ónimderi jetkizildi.

«QTJ» UK» AQ kórmedegi pavılonymen tanysqan QR Prezıdenti N. Nazarbaev qazaqstandyq kásiporyndardyń ózbek temirjolyn jańǵyrtýǵa qatysýy jóninde kelissózder júrgizilýde.

Sondaı-aq Memleket basshysy Qazaqstan men Ózbekstan arasyndaǵy jolaýshylarǵa arnalǵan júrdek poıyzdardyń qozǵalysy týraly surady.

Q. Alpysbaev Memleket basshysyna «Almaty-Tashkent baǵdaryna «Tulpar-Talgo» júrdek poıyzy qatynap jatqandyǵyn, onyń joldy 30 saǵattan 17 saǵatqa deıin qysqartqandyǵyn jetkizdi.

Qazaqstan-ózbek bıznes forýmy aıasynda «QTJ» UK» AQ men «ÝTI» AQ arasynda strategııalyq seriktestik týraly Kelisimge qol qoıyldy Ol Kelisim boıynsha QTJ bıylǵy jyl aıaǵyna deıin Ózbekstanǵa 5 myń tonna rels ónimderin jetkizýge ýaǵdalasty. Bıznes forým aıasynda Ózbekstanǵa jylyna 13,5 myń tonna temirjol ónimderin jetkizýge uzaqmerzimdik Kelisimge qol qoıyldy. 2020 jyldarǵa deıin ózbek temirjolyna 40 myń tonna rels ónimderin jetkizý josparlanyp otyr.

Qazaqstan Respýblıkasy Prezıdenti men Ózbekstan Respýblıkasynyń Prezıdenti Shavkat Mırzıevpen resmı kezdesýi aıasynda «Qazaqstan temir joly» UK» AQ men «Ýzbekıston temır ıýlları» AQ arasynda stretegııalyq seriktestik týraly Kelisimge» qol qoıyldy. Bul mańyzdy qujat boıynsha taraptardyń aýmaǵymen ótetin poıyzdarǵa qyzmet kórsetýde jáne temirjol ónimderin eksporttaýda eki el arasynda ózara tıimdi halyqaralyq kólik baǵdaryna básekelestikke saı qyzmet kórsetý qarastyrylady.