Qazaqstandyq pikirsaıys týrnıriniń jeńimpazdary 2 mln teńgeden astam syıaqy aldy - mınıstrlik

NUR-SULTAN. QazAqparat - Qazaqstandyq pikirsaıys týrnıriniń jeńimpazdary ýnıversıtet granty men 2 mln teńgeden astam syıaqylarmen marapattaldy, dep habarlaıdy QazAqparat QR bilim jáne ǵylym mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, Sátbaev Ýnıversıtetinde 7–11 synyp oqýshylary men JOO stýdentteri arasynda «TECHNO CUP VI!» atty respýblıkalyq pikirsaıys týrnıri ótti. Oǵan irikteý kezeńinen ótken 400 pikirsaıysshy qatysty, olardyń arasynda elimizdiń ár óńirinen jáne respýblıkalyq mańyzy bar qalalardan kelgen 128 mektep oqýshylary bar.

Týrnırdiń qorytyndysy boıynsha Mektep lıgasynda Aqtóbe qalasyndaǵy M.Qurmanǵalıeva atyndaǵy mektep-gımnazııanyń oqýshylary Álisher Qýanysh pen Aqyljan Iteǵulov jeńimpaz atandy. Olar Sátbaev Ýnıversıtetiniń bilim grantyn utyp aldy. Álisher qazir 10-shy synypta, Aqyljan 11-shy synypta oqıdy.

«Biz mekteptegi pikirsaıys úıirmesine eki jyldan artyq qatysamyz. Pikirsaıys jarystary bizge unaıdy, óıtkeni onda sheshendik ónerdi, sheberlikti shyńdaısyń, halyq aldynda sóıleýdi, synı turǵydan oılaýdy úırenesiń, sonymen qatar oı órisiń men erýdıtsııa daǵdylaryńdy damytasyń. Pikirsaıys týrnıriniń jeńimpazy atanyp, Sátbaev Ýnıversıtetiniń bilim grantyn jeńip alǵanyma óte qýanyshtymyn», – dedi Aqyljan Iteǵulov.

Qazaq jáne orys lıgalarynyń jeńimpazdary, sondaı-aq týrnırdiń úzdik spıkerleri jalpy somasy 2 mıllıon teńgeden astam aqshalaı syılyq aldy. Sondaı-aq «Úzdik tóreshi» nomınatsııasynyń ıegeri anyqtaldy, atalǵan nomınatsııa boıynsha HATI-nyń stýdenti Ýlıana Vılemson jeńimpaz atandy.

Aıta keteıik, týrnır amerıkalyq, brıtandyq parlamenttik pikirsaıys formattarynyń erejeleri jáne Lınkoln-Dýglas erejeleri boıynsha ótti. Fınaldyq oıynnyń qorytyndysy boıynsha Radıoelektronıka jáne baılanys áskerı-ınjenerlik ınstıtýtynyń «Patrıot» pikirsaıys klýby úzdik delegatsııa atandy.