Qazaqstandyq memlekettik qyzmetshiler eńbek etkisi keletin memorgandardyń úshtigi ataldy
ASTANA. QazAqparat - Qazaqstandyq memlekettik qyzmetshiler eńbek etkisi keletin eń tartymdy memlekettik organdar belgili boldy, dep habarlaıdy QazAqparat tilshisi.
«2018 jyly memlekettik qyzmetke 12 myń adam jumysqa turdy. Olardyń úshten eki bóligi tómengi laýazymda jumysqa ornalasqan. Memlekettik qyzmetke kirgenderdiń 49 paıyzy áıelder. Eń tartymdy memlekettik organdardyń aldynda - Parlament Senatynyń apparaty tur. Ol jerde bir orynǵa 17 adam úmitker. Sol sekildi Prezıdent isteri basqarmasyndaǵy bir orynǵa 14 adam, bizdiń agenttikte 12,5 adam úmitker bolyp otyr.
Jergilikti deńgeıde saralar bolsaq, Astana, Almaty qalalary men Mańǵystaý oblysynda úmitkerlerdiń sany mol», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń memlekettik qyzmet departamentiniń dırektory Jarqyn Tileýkenov agenttikte ótken baspasóz máslıhatynda.
Onyń aıtýyna qaraǵanda, ótken jyly 7 myńǵa jýyq memlekettik qyzmetker laýazymdyq turǵyda ósken. Bul kórsetkish onyń aldyndaǵy jylǵa qaraǵanda 32 paıyzǵa artyq.
«Memlekettik qyzmettiń sapaly quramy kelesi kórsetkishter boıynsha aıqyndalady. Memlekettik qyzmetkerlerdiń 92 paıyzynda nemese 83 myń qyzmetkerde joǵary bilim bar. Al qalǵan 8 paıyzy - aýdandyq jáne aýyldyq deńgeıdegi atqarýshy organdardyń qyzmetkerleri. Memlekettik qyzmetkerlerdiń kóbi ekonomıka jáne bıznes, quqyqtaný, tehnıkalyq ǵylym men bilim salasy boıynsha oqý bitirgen», - deıdi ol.
Sonymen qatar, Jarqyn Tileýkenov shetelde bilim alǵan memlekettik qyzmetkerlerdiń sany ótken jyly eki esege artqanyn habarlaıdy.
«Álemniń eń úzdik 100 ýnıversıtetinde oqý bitirip kelgen qyzmetkerlerdiń sany qazirgi tańda - 154. Ortalyq deńgeıde olardyń 124-i, aımaqtyq deńgeıde 30-y eńbek etip júr. Basshylyq qyzmette ondaı sanattaǵy 62 memlekettik qyzmetker bar», - deıdi ol.
