Qazaqstandyq ǵarysh apparaty halyqaralyq jarysta úzdikter qatarynan kórinýi yqtımal
QR Bilim jáne ǵylym mınıstrligi men «Nazarbaev Zııatkerlik mektepteri» derbes bilim berý uıymy uıymdastyrǵan sharaǵa elimizdegi mektepterden 200-den astam oqýshy qatysýda. Atap aıtqanda, balalar arasyndaǵy bul saıys Robot tehnıkalary halyqaralyq olımpıadasynyń «World Robot Olimpiad - WRO» erejelerine sáıkes ótkizilýde. Júldeli orynǵa ıe bolǵan komandalar tanymal kompanııalardyń atynan baǵaly syılyqtarmen yntalandyrylady. Sonymen qatar Respýblıkalyq olımpıadanyń jeńimpazdary bıyl qarashada Úndistanda ótetin halyqaralyq olımpıadada ulttyq qurama qatarynda elimizdiń namysyn qorǵaıtyn bolady. Jyl saıyn WRO saıystaryna álem elderinen 20 myńnan astam komanda qatysady.
Búgingi bilim saıysynda balalardyń jobalarymen tanysý úshin arnaıy QR Bilim jáne ǵylym mınıstri Erlan Saǵadıev keldi.
Respýblıkalyq olımpıada barysynda oqýshylardyń jasap shyqqan robottary segiz sanat boıynsha saıysqa túsip jatyr. Robottar fýtbol oınaý, qoqys tazalaý jáne basqa da synaqtardan ótedi.
«Búgin osy jasalǵan jabdyqtardyń barlyǵy Úndistanda ótetin jarystyń negizinde uıymdastyrylyp jatyr. 21 ǵasyrdyń eń úlken ereksheligine toqtalatyn bolsam, búginde bilim berýdiń uıytqysy jalǵyz mektep, oqytýshy jáne oqýlyq ǵana emes. Qazirgi kezde balalardyń ónertapqyshtyǵymen izdenýi mańyzdy. Bilim alýdyń kózderi jetkilikti ekenin bilesizder. Osy rette balalardy yntalandyryp, olardyń ınjenerlik oı-sanasyn damytatyn, ІT-tehnologııany jaqsy ıgeretindeı múmkindikterdi jasaýymyz kerek. Jalpy Nazarbaev zııatkerlik mektepteri osymen úshinshi ret elimiz kóleminde robot tehnıkalary boıynsha jarys uıymdastyryp otyr. Birinshi ret ótkizgende 2014 jyly Sochıdegi halyqaralyq saıystan bizdiń komanda úshinshi orynǵa ıe bolǵan edi»,-dedi «Nazarbaev Zııatkerlik mektepteri» DBBU Basqarma tóraıymy Kúlásh Shámshıdınova.
Aıta keteıik, 2014 jyly Sochıge Taldyqorǵannan barǵan komanda úshinshi oryn alǵan bolatyn. Olar sol kezde keńistikte ǵarysh stansasyn burý táselderin jáne jobasyn tanystyrǵan edi.
Aǵymdaǵy jyly osy taldyqorǵandyq komandanyń quramynda bolǵan Bek Talǵat jańa jobasyn tanystyrdy.
«Bıylǵy jobanyń maqsaty men taqyryby basqashalaý. Bul robottalǵan apparat orbıtany ǵarysh qoqystarynan tazartady. Biz kóp ýaqyttan beri osy ıdeıany taldap, ony júzege asyrýǵa sheshim jasadyq. Spýtnıktik apparat orbıtadaǵy qoqystardy jınap, osy júktiń barlyǵyn Kúnniń kózine qaraı baǵyttaıda. Nátıjesinde qoqystyń barlyǵy Kún qyzýyna órtenip ketedi»,-dedi B. Talǵat.
Aıta keteıik, olımpıadaǵa kelgen mamandar Anatolıı Alekseev pen Bek Talǵattyń bul jabasy úzdikterdiń biri dep baǵalaýda. Sebebi, búginde álem elderi ǵarysh salasyn damytý kezeńinde bul balalardyń jobasyna iri kompanııalar qyǵýshylyq tanytýy múmkin. Osy rette orbıtada ǵarysh qoqystaryn jınaýǵa negizdelgen bul apparat Úndistandaǵy halyqaralyq saıysta da úzdikter qatarynan kórinýi yqtımal.
Bıyl kúzde Delıde ótetin olımpıadaǵa Qazaqstan quramasyna úzdik nátıje kórsetken 16 bala iriktelinedi, ıaǵnı eki balany qamtı otyryp segiz komanda bilim saıysyna qatysady.
