QAZAQSTANDYQ BATYRLAR: Vasılıı Klochkov

ASTANA. QazAqparat - Keńes Odaǵynyń Batyry, jıyrma segiz gvardııashy-panfılovshylardyń biri Vasılıı Georgıevıch Klochkov 1911 jyly 8 naýryzda Reseıdiń Saratov oblysynyń Voskresensk aýdanynda týǵan.

Ol 1929 jyly Jumysshy jastar mektebin KSRO Saýda halkomatynyń Búkilodaqtyq syrttan oqý ınstıtýtyn bitirgen. 1929-40 jyldary Reseıdiń esep-qısap mekemelerinde qyzmet atqardy. 1940 jyly qyrkúıekte Almatyǵa kelip, Qazaqstannyń Saýda halkomatynda qyzmet istedi, Almaty ashana-restoran tresi basqarýshysynyń orynbasary boldy. 1941 jyly maýsymda Qyzyl Armııa qataryna shaqyrylyp, Almatyda jasaqtalǵan 316-atqyshtar dıvızııasy 1075-atqyshtar polkiniń quramynda urysqa qatysty.

1941 j. 15 qarashada Germanııa áskerleri 51 dıvızııamen Máskeýge ekinshi "negizgi sheshýshi shabýyldy" bastady. Batys maıdan jaýyngerleri aýyr urystar júrgizdi. Osy maıdanǵa kiretin 16-armııanyń quramynda Almatyda jasaqtalǵan general-maıor I.V. Panfılov basqarǵan 316-atqyshtar dıvızııasy (keıinnen 8-gvardııalyq-panfılovshylar dıvızııasy) Máskeý túbindegi Volokolam tas jolyn qorǵady. 16-qarashada jaý Volokolam baǵytynda urysqa shyǵyp, Dýbosekovo razezindegi 1075-atqyshtar polki 4-rotasynyń 2-vzvody turǵan bekinis shebine shabýyl jasady.

V.G. Klochkov basqarǵan vzvod jaýyngerleri - barlyǵy 28 adam myltyqpen, janarmaı quıylǵan shólmektermen, granatalarmen qarýlanyp, jaýdyń 20 tankisimen 4 saǵatqa sozylǵan urys júrgizdi. Jaýdyń 14 tankisi qıratylyp, panfılovshylar arasynan da birneshe adam qaza tapty. Jaý urysqa taǵy 30 tank shyǵardy. Qazaqstandyq jaýyngerler soǵys tarıhynda sırek kezdesetin erlik jasap, jaýdyń bolat qursanǵan mashınalaryna tótep berdi. 28 panfılovshylardyń 23-i qazaǵa ushyrady, biraq jaý tankileri olardyń shebinen óte almady. Rotanyń saıası jetekshisi V. G. Klochkov «Rossııa keń - baıtaq, biraq sheginerge jer joq, artymyzda Máskeý» uranyn kóterdi. Onyń bul sózi búkil maıdanǵa tarady. Keıinnen «28 panfılovshylar» erligi ańyzǵa aınaldy. Olar qasyq qany qalǵansha shaıqasty. Bári derlik qaza tapty, biraq jaýdy ótkizbedi.

KSRO Joǵarǵy Keńesi Prezıdıýmynyń 1942 j. 21 shildedegi Jarlyǵymen bul jaýyngerlerdiń barlyǵyna Keńes Odaǵynyń Batyry ataǵy berildi. Bul joǵary ataqqa saıası jetekshi osy shaıqasta erlikpen qaza tapqan Vasılıı Klochkov te ıe boldy. Ol sondaı-aq 2 ret Eńbek Qyzyl Tý ordenimen marapattalǵan.

Batyrlardyń esimimen atalatyn mektep, aýyl, aýdan, kóshe, parkter bar. Almaty qalasyndaǵy 28 panfılovshy-gvardııashylar parkinde, Máskeý túbindegi Dýbosekovo razezinde jáne batyrlardyń týǵan jerinde eskertkishter ornatylyp, memorıaldyq murajaı ashylǵan.