QAZAQSTANDYQ BATYRLAR: Talǵat Bıgeldınov
Ómirbaıany
Aeroklýbta tamasha tájirıbeden ótip, ustazdarynyń oń kózine túsken talapty jigit Talǵatty 1940 jyly Saratov áskerı-avıatsııa mektebine oqýǵa jiberedi. Ondaǵy qatań suryptaýdan janarynyń oty bar jigit aman-esen ótedi. Saratovtaǵy ushqyshtar mektebin eki jyl oqyp, serjant shenimen bitirgen soń, Chkalovtaǵy bombalaýshy ushqyshtar mektebin aıaqtaıdy.
Al qan maıdanǵa attanar aldynda Ijevsk qalasynan «IL-2» shabýyldaýshysymen ushýdy úırenip shyǵady. Sol kúnnen bastap áskerıler arasynda «ushqysh tank» dep atalyp ketken «Ilıýshaǵa» basy bútin baýyr basyp, 1942 jyly maıdanǵa attanady. Osy ózi bir kórgennen qatty unatqan ushaqpen kók júzinde 500 saǵat bolady. 305 ret áskerı shabýylǵa shyǵyp, jaý uıasy - Berlındi alýǵa birinshi bolyp qatysady. Fashıster ózderine aıaýsyz ólim oǵyn sepken Talǵat mingen ushaqty «Qara ajal» dep ataǵan. 23 jasynda Keńes Odaǵynyń eki márte batyry ataǵyn ıelenip, soǵysta nebir kózsiz erlik kórsetken qyran qazaq qan maıdannan aman-esen oralǵan soń, áskerı áýe akademııasyn aıaqtaıdy. Qazaqstannyń áskerı-áýe kúshterinde túrli basqarý qyzmetinde bolady. 1956 jyly densaýlyǵyna baılanysty demalysqa shyǵady. KSRO Joǵarǵy Keńesiniń úsh márte depýtaty bolyp saılanady. 1957 jyldan 1970 jylǵa deıin azamattyq avıatsııany basqaryp, Almaty, Aqmola, Arqalyq, Qyzylorda, Qaraǵandy, Taraz syndy kóptegen qalalarda aeroport salý isine ólsheýsiz úles qosady. 1968 jyly Máskeý ınjenerlik-qurylys ınstıtýtyn bitirip, memlekettik qurylys salasynda da qyzmet atqaryp, ásirese, Almatydaǵy nebir tamasha záýlim ǵımarattardyń boı kóterýine atsalysady. Búginde 92 jasqa aıaq bassa da densaýlyǵy myqty, tyń Talǵat aǵamyz tabıǵat aıasynda jıi bolǵandy unatady. Bal arasyn, baý-baqsha ósirýmen aınalysady, qoǵamdyq jumystan da qol úzgen emes. Derekkóz: Vıkıpedııa
