QAZAQSTANDYQ BATYRLAR: Leonıd Beda

Beda Leonıd Ignatevıch 1920 jyly tamyzdyń 16-ynda Qostanaı oblysy Uzynkól aýdany Novopokrovka aýylynda ómirge kelip, 1976 jyly jeltoqsannyń 26-sy kúni Belarýs Respýblıkasynyń Mınsk qalasynda dúnıeden ozǵan. Ekinshi dúnıejúzilik soǵysqa qatysýshy, avıatsııa general-leıtenanty (1972), ushqysh-shabýyldaýshy. KSRO-ǵa eńbek sińirgen áskerı ushqysh. Ulty - orys.

Oral pedagogıka ınstıtýtyn (1940) bitirgen. 1940 jyly Keńes áskeri qataryna shaqyryldy. Chkalov áskerı avıatsııalyq ushqyshtar mektebin bitirgen soń 1942 jyldyń tamyz aıynda maıdanǵa jiberildi. Ol Stalıngrad, Donbass, Taganrog, Kenıgsberg qalalaryn azat etý shaıqastaryna qatysty. 75-gvardııalyq avıatsııalyq shabýyldaýshy polktiń (4-Ýkraına maıdany, 8-áýe armııasy, 1-gvardııalyq shabýyldaýshy avıatsııalyq dıvızııa) eskadrılıa komandıri. 1944 jyldyń sáýirine deıin 109 ret áskerı tapsyrmamen jaý áskeri shoǵyrlanǵan jerler men bekinisterin shabýyldady. Osy erlikteri úshin KSRO Joǵary Keńesi Tóralqasynyń Jarlyǵymen Keńes Odaǵynyń Batyry ataǵy berildi (26.10.1944). Sol polktiń (Z-Belarýs maıdany, 1-áýe armııasy, 1-gvardııalyq shabýyldaýshy avıatsııalyq dıvızııa) komandıriniń orynbasary bola júrip, 105 áskerı tapsyrmany oryndady. Osy erlikteri úshin KSRO Joǵary Keńesi Tóralqasynyń Jarlyǵymen Bedaǵa ekinshi ret Keńes Odaǵynyń Batyry ataǵy berildi (29.6.1945). Lenın, 4 ret Qyzyl Tý, Aleksandr Nevskıı, l-dárejeli Otan soǵysy, «Qyzyl Juldyz» ordenderimen, medaldarmen marapattalǵan. Bedaǵa Qostanaı qalasynda qoladan bıýst ornatylǵan. Mınsk qalasynda bir dańǵylǵa, Grodo oblysy Lıda qalasyndaǵy kóshege, Harkovtaǵy mektepke Beda esimi berilgen.

Ol 1976 jyly jol apatynan qaza tapty.