Qazaqstandyq basketbolshy qyzdar Azııa chempıonatyna qatysady

ASTANA. QazAqparat  - 28 qazan men 3 qarasha aralyǵynda Úndistannyń Bengalýrý qalasynda basketboldan 18 jasqa deıingi qyzdar arasyndaǵy Azııa chempıonaty ótedi, dep habarlaıdy QazAqparat tilshisi.

QR Ulttyq olımpıadalyq komıtetiniń baspasóz qyzmeti habarlaýynsha, atalǵan qurlyq dodasyna Qazaqstan qyzdar komandasy da qatyspaqshy.

Osymen 25-shi ret ótetin Azııa birinshiligine qazaqstandyqtar 2007 jyldan beri qatysyp keledi. Alaıda, komandanyń kórsetkishi kóńil qýantarlyqtaı emes.

Bizdiń komandanyń eń joǵarǵy kórsetkishi 2010 jyly ǵana tirkelgen, ol 6-shy oryn.

Ulttyq quramaǵa «Ertis», «Astana Taıgers», sondaı-aq, Aqtóbe men Almaty klýbtarynda synǵa túsetin jas basketbolshylar shaqyrtý alǵan.

Azııa chempıonatynda Qazaqstan Gonkong, Sırııa jáne Samoamen birge V tobynda baq synaıdy.

Aıta keteıik, Úndistandaǵy Azııa chempıonaty 19 jasqa deıingi qyzdar arasynda ótetin álem birinshiligine irikteý kezeńi sanalady.