Qazaqstandyq ansambl Túrkııada ótken halyqaralyq baıqaýda 1-oryn aldy

ORAL. QazAqparat – Batysqazaqstandyq «Qyz Jibek» dástúrli ánshiler ansambli Túrkııanyń Izmır qalasynda ótken «International Foça Forgotten Children Games and Dance Festival» atty halyqaralyq festıval-baıqaýynda» birinshi orynǵa ıe boldy, dep habarlaıdy QazAqparat tilshisi.

Atalmysh baıqaýǵa Ázerbaıjan, Bolgarııa, Rýmynııa, Grýzııa, Makedonııa, Kosovo, Bosnııa jáne Gertsovına, Grekııa, Serbııa, Moldova, Ýkraına, Túrkııa, Qazaqstan elderinen myńǵa jýyq bala qatysyp, baq synady.

«Qyz Jibek» ansamblin 2011 jyly belgili ánshi-termeshi, sazger, ustaz, «Eren eńbegi úshin» medaliniń ıegeri Baıan Qabıeva Kaztalov aýdany Jalpaqtal aýylynda uıymdastyrǵan bolatyn. Sodan beri respýblıkalyq, halyqaralyq baıqaýlarda top jaryp úlgergen ansamblge Baıan Qubaıqyzymen birge onyń uly Asylhan Boltanov jetekshilik etip keledi.

Asylhan Qymyzbaıulynyń aıtýynsha, qazirgi kezde ansamb quramynda 30 qyz bala (úlken jáne kishi top) bolsa, repertýarda otyzǵa tarta án, terme bar.

«Ansambl qazaqtyń tól ónerin nasıhattap qana qoımaı, tatar, orys, qyrǵyz, túrik halyqtarynyń ánderin de oryndaıdy. Bul joly meniń «Qazaq eli jasasyn!» atty ánime qosa Mahambettiń termesin, túriktiń besik jyryn shyrqady. 23 sáýirde Túrkııanyń Ulttyq táýelsizdik kúnimen qosa Balalar kúni de atalyp ótiledi. Ol elde balalarǵa erekshe kóńil bólinedi eken. Mınıstrlikten kelgen basshylar ár topqa kelip, «Qosh keldińder!» dep qurmet kórsetti. Festıval qorytyndysynda birinshi orynmen birge Bolgarııada 29 maýsym – 3 shilde aralyǵynda ótetin «Sunny days in Sunny Beach» atty halyqaralyq baıqaýǵa joldama aldyq», dedi QazAqparat tilshisine A.Boltanov.