Qazaqstandyqtar jappaı senbilikke shyǵyp, aǵash ekti
AQTÓBE. KAZINFORM — Elimizde «Taza Qazaqstan» ekologııalyq aktsııasy aıasynda jappaı senbilik ótti. Oǵan myńdaǵan adam qatysty.
Almatylyqtar soǵys ardagerleri men maıdangerler jerlengen zıratty tazartty
«Taza Qazaqstan» aktsııasy aıasynda almatylyqtar Ekinshi dúnıejúzilik soǵys ardagerleri men maıdangerler, jazýshylar jáne eldiń kórnekti qaıratkerleri jerlengen Keńsaı zıratynda tazartý jáne abattandyrý jumysyn júrgizdi. Jastar aktsııa kezinde belsendilik tanylyp, zıratty qoqystan tazartyp, retke keltirdi. Uıymdastyrýshylardyń aıtýynsha, bul ótkenge taǵzym etip, maıdangerlerdiń rýhyna qurmet kórsetý, óskeleń urpaqtyń tarıhı sanasyn qalyptastyrýǵa baǵyttalǵan jumys. Aktsııaǵa stýdentter, jumysshy jastar jáne volonterlik uıymdar qatysty. Olar tazalyq jumystarynan keıin taǵzym etip, gúl qoıdy.
Al Qazaqstan halqy Assambleıasynyń músheleri Naýryzbaı aýdanyndaǵy saq qorǵany aýmaǵyna aǵash ekti. Bul Qazaqstan halqy Assambleıasynyń 30 jyldyǵy aıasynda qolǵa alynǵan ıgi is.
Aqtóbelik jastar «Taza qala» ekologııalyq aktsııasyn bastady
Búgin Aqtóbede de senbilik, aǵash otyrǵyzý jumysy júrdi. Túrli kásiporyndar men shaǵyn jáne orta bıznes sýbektileri jan-jaǵyn kúl-qoqystan aryltyp, ózine belgilengen aýmaqty jınady. Al jastar bolsa «Taza Qazaqstan» respýblıkalyq aktsııasy aıasynda Jeńistiń 80 jyldyǵy jáne Keńes odaǵynyń batyry Álııa Moldaǵulovanyń 100 jyldyǵyna oraı «Taza qala» 4 aılyq ekologııalyq aktsııasynyń ashylý saltanatyn ótkizdi. Tabıǵattyń jas janashyrlary bul joly 312-atqyshtar dıvızııasy men 101-atqyshtar brıgadasynyń qurmetine qoıylǵan zeńbirek eskertkish-obelısk aýmaǵyn kúl-qoqystan tazalady.
— Búgingi senbilik tek tazalyq sharasy ǵana emes, bul birligimizdiń, ortaq jaýapkershiligimizdiń kórinisi. Qorshaǵan ortamyzdy taza ustaý — árbirimizdiń azamattyq paryzymyz. Tabıǵat — bizge amanat. Ony aıalaý, qorǵaý — bolashaq urpaqqa degen qamqorlyǵymyz, — deıdi volonter Abyl Kenjebek.
Jalpy jastardyń boıyndaǵy týǵan jerge degen súıispenshilikti arttyrý, tabıǵatqa janashyrlyqpen qaraýdy úıretý mańyzdy. Búgin tazalyq sharasyna 150-ge jýyq volonter jáne Jastar resýrstyq ortalyǵynyń mamandary, stýdentter qatysty.
— Tazalyq jumystary — adamdardy biriktiretin, týǵan jerge degen súıispenshilikti arttyratyn ıgi dástúr. Bul kún tek qoqys jınaý emes, bul eńbek arqyly tárbıeleý, urpaqqa úlgi kórsetý kúni. Bárimizdiń birigip atqarǵan eńbegimiz qalamyzdyń kórkeıip, kógaldanyp, jaıqalyp turýyna sebep bolady. Osyndaı is-sharalar arqyly biz tek tazalyqty ǵana emes, birlikti, uıymshyldyqty da nasıhattaımyz, — deıdi volonter Janseıit Qýandyqov.
«Taza Qazaqstan» jalpyulttyq bastamasy aıasynda dinı birlestik ókilderi de qalalyq senbilikke qatysty. Olar Altyn orda turǵyn alabyna jınalyp, Alash dańǵyly boıyn tazartty. Búgingi kúni Aqtóbe oblysynda 10 konfessııany qamtyǵan 98 dinı birlestik tirkelgen.
Qostanaılyqtar aǵash ekti, Qyzylorda jastary senbilikke shyqty
Al Qostanaıda «Taza Qazaqstan» respýblıkalyq aktsııasy aıasynda aǵash otyrǵyzdy. Aktsııa N.Nazarbaev kóshesinda, iri saýda-oıyn-saýyq ortalyǵynan bastap Muhamedjanov kóshesin qamtydy.
— Baǵdarlama búkil el boıynsha ekologııalyq jaǵdaıdy jaqsartýǵa, eldi mekenderdi abattandyrýǵa jáne kógaldandyrýǵa baǵyttalǵan. Qostanaı qalasynda «Búkilqazaqstandyq aǵash otyrǵyzý kúni» aktsııasy ótti. Qala turǵyndary men barlyq mekeme qyzmetkeri biraýyzdan kelip, belsendilik tanytty, — dedi uıymdastyrýshylar.
Sonymen birge qyzylordalyq jastar Jeńistiń 80 jyldyǵyna oraı «Taǵzym» alańynda tazalyq jáne abattandyrý jumystaryn júrgizdi. Soǵys qaharmandaryna qurmet kórsetý jáne ekologııalyq mádenıetti nyǵaıtýǵa baǵyttalǵan is-shara «Taza Qazaqstan» ekologııalyq aktsııasy aıasynda uıymdastyryldy. Jastar memorıal aýmaǵyn qoqystan tazartyp, abattandyrdy.
Senbilikke shyqqan 128 myńnan astam erikti, qoǵam qaıratkerleri, memlekettik qyzmetshiler men kásiporyn qyzmetkerleri 4 000 tonnadan astam qoqys jınady. Saıabaqtar, shaǵyn demalys oryndary, tarıhı-mádenı eskertkishter, áleýmettik, ónerkásip jáne bıznes nysandary, ózen, kólder aýmaǵy, jasandy sý aıdyndary, sýburqaqt, aryq tazalandy. Jumys barysynda 900-den astam tehnıkamen qoqys tasymaldandy, jer tegisteldi. Aıtyp óteıik, bıyl Qyzylordada 95 353 kóshet egilgen.
Rıdderde Búkilqazaqstandyq aǵash otyrǵyzý kúni atap ótildi
ShQO-da Búkilqazaqstandyq aǵash otyrǵyzý kúni ótti, al Rıdder qalasynda 3 myńnan astam adam shyǵyp, aǵash ekti. Olar búgin 5 myń kóshet otyrǵyzdy. Onyń ishinde 1500 shyrsha kósheti orman qoryn molyqtyrdy.
— Jyl basynan bastap Rıdder men onyń mańyna 10 myńnan astam kóshet otyrǵyzyldy. Al byltyr 8 myń kóshet otyrǵyzylǵan edi. Bıyl barlyq is-sharaǵa 5000-nan astam adam qatysty. Mundaı bastamalar qorshaǵan ortany qorǵaıdy ári týǵan ólke tabıǵatyna jaýapkershilikpen qaraýdy úıretedi, — dep habarlady ShQO ákimdigi.
Qaraǵandyda otyrǵyzylǵan aǵashtyń óz aty bar
Qaraǵandynyń Shahtınsk qalasynda da jasyl beldeý alańy bar. Munda balalar men eresekter búginde de aǵash ekti. Jeńistiń 40 jyldyǵy gúlzatyna 300 túp qaraǵash otyrǵyzyldy. «Tolǵanaı» ekologııalyq senbiliginiń jas qatysýshylary ózi ekken kóshetke ataý berip úlgerdi.
— Kóshetter tálimbaqtan ákelindi. Aýa raıyna tózimdi dep qaraǵash otyrǵyzyldy. Buǵan deıin egilgen kóshetterdi qaraǵan kezde tez beıimdelip, jersinetinin kórdik. Sonyń negizinde Jeńistiń 40 jyldyǵy gúlzaryna osy aǵashtyń kóshetteri egildi. Byltyr bul aýmaqta abattandyrý jumystary júrdi, — dedi Shahtınsk qalasy ákiminiń orynbasary Arman Sattybaev.
Búgin qalada eskertkish mańy da tazartyldy. Eriktiler jalǵyzbasty qarttardyń aýlalaryn jınady. Jalpy eki aılyq tazalyq jumystary kezinde barlyǵy 300 ga aýmaq jınaldy, 400 tonna qoqys shyǵaryldy. Sonymen birge Shahtınsk aýmaǵyna 1700-den astam aǵash otyrǵyzyldy.
Al Temirtaýda «Taza Qazaqstan» aktsııasyn Qaraǵandy ındýstrıaldy ýnıversıtetiniń qyzmetkerleri men oqytýshylary qoldady. Olar JOO aýmaǵyna qaıyń otyrǵyzdy.
Túrkistan oblysynda 49 tonna qoqys jınaldy
Túrkistan oblysy Shardara aýdanynda da tazalyq jumystary júrgizildi. Senbilikke barlyǵy 1500 adam qatysyp, 29 arnaıy tehnıka tartyldy. Nátıjesinde 49 tonna qoqys arnaıy polıgonǵa tógildi.
Jalpy bıyl qańtar-sáýir aılary aralyǵynda aýdannan 524 tonnaǵa jýyq turmystyq qaldyq shyǵaryldy. Sonymen qatar Shardara-Keles, Shardara-Jetisaı, Shardara-Arys oblystyq mańyzy bar kúre joldar boıyna tazalyq jumystary júrgizildi. Saýran aýdany Júınek aýyldyq okrýginde ornalasqan Dańq alleıasy abattandyryldy. Onyń ishindegi shóp orylyp, qýraǵan buta kesildi, aǵashtar áktelip, jasyl jelekke kútim jasaldy. Jaıaý júrginshi joldary men oryndyqtar, jaryqshamdar syrlanyp, qorshaýlar boıaldy.
Atyraýdyń Qurmanǵazy aýdanynda 600 túp aǵash otyrǵyzdy
Atyraýdyń Qurmanǵazy aýdanynda aǵash otyrǵyzý aktsııasyna memlekettik qyzmetshiler, orman sharýashylyǵy salasynyń mamandary, bilim jáne densaýlyq saqtaý uıymdarynyń qyzmetkerleri, kásipkerler, jastar uıymdary jáne aýyl turǵyndary qatysty. Olar týǵan jerdiń ajaryn arttyrýǵa óz úlesin qosty. Іs-shara aıasynda aýdan boıynsha barlyǵy 600 túp aǵash egildi. Sonymen birge aktsııaǵa 3000-ǵa jýyq turǵyn qatysyp, qorshaǵan ortany qorǵaý men jasyl jelekti keńeıtý isine qoldaý bildirdi.
Sonymen qosa Premer-mınıstr Oljas Bektenov bastaǵan Úkimet apparatynyń qyzmetkerleri Memleket basshysy jarııalaǵan «Taza Qazaqstan» ekologııalyq bastamasy aıasynda senbilikke qatysty. Jalpy aýdany 68,5 myń sharshy metrden asatyn EXPO saıabaq aımaǵynyń aýmaǵynda qaraǵaı, qaıyń jáne basqa da aǵash túrleriniń kóshetteri otyrǵyzyldy.
Sondaı-aq Memlekettik keńesshi Erlan Qarın Ulttyq quryltaıdyń jáne Jastar saıasaty jónindegi keńestiń bir top múshelerimen birge aǵash otyrǵyzdy. Onyń sózinshe, «Taza Qazaqstan» aktsııasy bir jyl buryn Memleket basshysy Qasym-Jomart Toqaevtyń bastamasymen qolǵa alyndy. Jurtshylyq bul bastamaǵa birden qoldaý kórsetti.
Aıta keteıik, Aqtaýda da «Taza Qazaqstan» aktsııasy aıasynda senbilik ótti. Tazalyq jumystaryna memlekettik mekemelerdiń qyzmetkerleri atsalysty. Olar 34-shaǵyn aýdandaǵy «Ana men bala» ortalyǵynyń aýmaǵy men 35-shaǵyn aýdan ishin qoqystan tazartty.
Al Jambyl oblysynda 1 myń gúl otyrǵyzyldy. Bul kúni oblystaǵy barlyq memlekettik mekemede, onyń ishinde mádenıet, bilim, sport mekemeleri, dinı oryndarda, sonymen birge, kásipkerlik, týrıstik nysandar, iri saýda oryndary, dúkender men meıramhanalardyń aýmaǵynda tazalyq jumystary uıymdastyryldy.