Qazaqstandyqtar jańa ádistermen em almaı júr - depýtat

ASTANA. KAZINFORM — Eskirgen emdeý hattamalary úlken máselege aınaldy. Bul týraly Májilisiniń jalpy otyrysynda depýtat Ashat Aımaǵambetov málim etti.

- Ár adamdy emdegende, dárigerler arnaıy emdeý hattamasynda kórsetilgen dárilerdi paıdalanýy tıis. Al emdeý hattamalary ýaqytyly jańartylmaı jatyr. Klınıkalyq hattamalardyń shamamen 70 paıyzy 5 jyldan 12 jylǵa deıin qaıta qaralmaǵan. Qazir 1 jyl ishinde jańa dári túri paıda bolady. Osyǵan baılanysty qazaqstandyqtar jańa ádistermen em ala almaı júr dep aıtýǵa bolady, - dedi A.Aımaǵambetov palata otyrysynda dári-dármekpen qamtamasyz etý júıesine júrgizilgen memlekettik aýdıt nátıjesin talqylaý kezinde.

Onyń aıtýynsha, hattamalardy bekitý protsesiniń ózi de óte kúrdeli. Keıde ol birneshe jylǵa sozylyp ketedi.

- Taǵy bir másele – tıimdi preparatty tizimge engizý úshin óndirýshiniń ótinishi kerek. Tıimsizderdi tizimnen alyp tastaý úshin de ázirleýshiniń ótinishi qajet. Bylaı qaraǵanda – paradoks. Bul norma tıimsiz dárilerdi tizimnen tez shyǵarýǵa jasandy túrde kedergi jasaý úshin engizilgen sııaqty. Mysaly, tirkeý merzimi ótken jáne tıimdiligi tómen bolǵan 409 preparat 4 jyl boıy formýlıardan alynbaǵan... Mundaı aqylǵa syımaıtyn jaǵdaıdyń sebebi – mınıstrliktiń buıryqtaryndaǵy qarama-qaıshylyqtar, - dedi depýtat.

Budan buryn habarlanǵandaı, QR Joǵary aýdıtorlyq palatasynyń tóraǵasy Álıhan Smaıylov Qazaqstanda azamattardy dári-dármekpen qamtamasyz etý júıesine júrgizilgen memlekettik aýdıt nátıjesin jarııalady.

Sonymen qatar Májilisiniń jalpy otyrysynda depýtat Ashat Aımaǵambetov Qazaqstanda dárini tirkeý úshin óte kúrdeli bıýrokratııalyq rásimderden ótý kerek ekenin aıtyp, osy salany synǵa aldy.