Qazaqstandyqtar úshin jalaqyny esepteý tártibi ózgerdi
ASTANA. KAZINFORM – Bıyl jeke tabys salyǵyn esepteý erejesi ózgerdi. Endi aıyna 150 myń teńgege deıin tabys tabatyn azamattar bul salyqty múlde tólemeıdi. Al jalaqysy joǵary adamdardyń da tóleıtin salyǵy burynǵyǵa qaraǵanda azaıdy.
Bul týraly Jibek Joly telearnasynyń «Jańa ýaqyt» aqparattyq-saraptamalyq baǵdarlamasynda salyq keńesshisi habarlady.
– Buryn jeke tabys salyǵyn eseptegende 14 AEK kóleminde shegerim qoldanylatyn. Qazir bul mólsher 30 AEK-ke deıin ulǵaıtyldy, ıaǵnı shegerim eki eseden de kóbeıdi. Bul ózgeris basqa shegerim túrleriniń alyp tastalýymen baılanysty. Buryn ıpoteka boıynsha nemese kópbalaly ata-ana retinde qosymsha shegerimder qoldanýǵa bolatyn. Qazir mundaı jeke shegerimder joq. Endi 30 AEK kólemindegi shegerim barshaǵa birdeı qoldanylady. ıAǵnı siz kópbalaly ata-ana sanatyna jatpasańyz da, ıpotekańyz bolmasa da, bul shegerimdi paıdalana alasyz, - deıdi Gúlnur Nurlanqyzy.
Jeke tabys salyǵy qalaı ózgerdi
Bıyl Qazaqstannyń Salyq kodeksine engizilgen túzetýlerge baılanysty jeke tabys salyǵyn esepteý tártibi jańartyldy. Negizgi ózgeris – salyq salynbaıtyn standartty shegerimniń ulǵaıýy.
Buryn memleket jalaqynyń shamamen 55 myń teńgesin ǵana esepke almaıtyn. Al jańa erejege sáıkes bul kórsetkish 130 myń teńgege deıin artty. ıAǵnı azamattyń tabysynyń edáýir bóligi endi salyqtan bosatylady.
Bul qalaı jumys isteıdi
Mysaly, aıyna 300 myń teńge jalaqy alatyn adamdy alaıyq.
Aldymen jalaqydan:
10% – zeınetaqy jarnasy,
2% – mindetti áleýmettik medıtsınalyq saqtandyrý jarnasy ustalady.
Odan keıin tabystan 130 myń teńge shegerilip, tek qalǵan bóligine ǵana salyq salynady. Sonyń nátıjesinde buryn shamamen 21 myń teńge salyq tólense, qazir bul soma 14 myń teńgege deıin azaıdy. ıAǵnı aı saıyn azamattyń qolynda 7-8 myń teńge artyq qarajat qalady.
Kimder múlde salyq tólemeıdi
Aıyna 150 myń teńgege deıin tabys tabatyn azamattar endi jeke tabys salyǵyn múlde tólemeıdi. Bul – jańa ózgeristiń eń mańyzdy tusy. Úkimettiń aıtýynsha, mundaı sheshim eń aldymen qarapaıym eńbek adamyn qoldaýǵa baǵyttalǵan. Sebebi eldegi jaldamaly qyzmetkerlerdiń jartysynan astamy dál osy deńgeıde jalaqy alady.
Sonymen qatar shegerim alý úshin burynǵydaı ıpoteka, kópbalaly otbasy nemese basqa da sanattar boıynsha qosymsha qujat jınaýdyń qajeti joq. Endi bul – barshaǵa ortaq standartty shegerim.
Salyq bárine birdeı emes
Jańa júıede salyq mólsheri tabys deńgeıine qaraı ózgeredi:
tabysy tómen azamattar burynǵydaı 10% tóleıdi,
al tabysy óte joǵary adamdar úshin 15% mólsherleme engiziledi.
Taǵy bir mańyzdy jańalyq – zeınetaqy tólemderinen salyq ustalmaıdy. ıAǵnı zeınetkerler óz jınaǵan qarajatyn tolyq kólemde alady, memleket ol tabysqa salyq salmaıdy.
Aıta keteıik, buǵan deıin Memleket basshysy jańa Salyq kodeksinde baqylaý jasaýǵa emes, ózara seriktestik ornatýǵa basa mán beriletinin aıtqan edi.