Qazaqstandyqtar sý tasqyny jaǵdaıyn onlaın baqylaı alady
ASTANA. KAZINFORM - Gov.kz saıtynda sý tasqynyna qarsy shara ornynan onlaın translıatsııany tamashalaýǵa bolady. Sergek VMS keshendi beınebaqylaý júıesiniń arqasynda qazaqstandyqtar naqty ýaqyt rejıminde Atyraý oblysy men Atyraý, Oral, Qostanaı qalalaryndaǵy jaǵdaıdy baqylaı alady.
Bóget, bekinis salý boıynsha naqty ýaqyttaǵy jumystardyń barysy týraly barlyq jaǵdaıdy beınebaqylaý kameralary arqyly baqylaýǵa bolady.
Bul jedel áreket etýge jáne mańyzdy sheshimder qabyldaýǵa múmkindik beredi.
«Elimiz úshin osyndaı qıyn kezeńde biz de óz tarapymyzdan sý tasqynyna qarsy sharalarǵa óz úlesimizdi qosyp jatyrmyz. Endi árbir azamat onlaın-translıatsııa arqyly Oral, Atyraý, Qostanaı qalalaryndaǵy sý tasqynyna daıyndyq boıynsha júrgizilip jatqan jumystardy teksere alady. Úlken sýǵa daıyndyq boıynsha atqarylyp jatqan jumystar úshin belsendi azamattarǵa, kompanııalarǵa, tótenshe jaǵdaılar qyzmeti men ákimdik qyzmetkerlerine alǵys bildiremiz», — dedi Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.
Qazirgi ýaqytta gov.kz portalyna Atyraý qalasy men Atyraý oblysy boıynsha 22 kameradan, Oral qalasy boıynsha 6 kameradan jáne Qostanaı qalasyndaǵy 6 kameradan beıne aǵyndar shyǵarylǵan.
Sergek Group mamandary onlaın túrde habar taratýdy Sergek apparattyq-baǵdarlamalyq júıeleri jumys isteıtin basqa qalalarda iske asyrýǵa daıyn.
«Bizdiń kompanııa pandemııa, Qańtar, Abaı oblysyndaǵy órt kezinde qol úshin bergen. Bul joly da shette qala almady. Tabıǵı apat týraly bilgennen keıin birden: biz qalaı kómektese alamyz degen suraq týyndady. Qazirgi ýaqytta TJ jedel shtabtarynda jáne zardap shekken eldi mekenderde bizdiń 14 qyzmetker jumys isteýde. Olardyń barlyǵy ózen arnasynyń ózgerýin jáne sý aǵynynyń kelýin baqylaý úshin beıne monıtorıng júıesiniń múltiksiz jumysyn qamtamasyz etýde», — dedi Sergek Group bas dırektory Áset Ahmetov.
Ol sondaı-aq Sergek Group mamandary sý tasqyny bastalǵannan beri zardap shekken eldi mekenderde barynsha kómek kórsetip júrgenin atap ótti.
Kompanııa Freedom Telecom jáne QR TsDIAÓM-men birlesip olar Inder aýdanynyń Inder kentinde, Mahambet aýdanynyń birneshe aýyldarynda, Damba kentinde jáne Atyraý qalasynyń Zaroslyı shaǵyn aýdanynda qashyqtan monıtorıng júrgizý úshin kameralar ornatty, sondaı-aq qajet bolǵan jerde sapaly ınternetke qol jetkizýdi qamtamasyz etti.
Sý tasqynyna qarsy is-sharalar ótkiziletin oryndardan Jnlaın translıatsııa GOV.KZ (ortalyq memlekettik organdar jáne jergilikti atqarýshy organdar) saıtynda osy siltemede kórsetiledi.
Sergek Video Management System (Sergek VMS) — qoǵamdyq qaýipsizdik kameralarynan beıne aǵyndardy saqtaý jáne olarmen jumys isteý júıesi.
Ol qala kósheleri men aýlalarynda, qoǵamdyq oryndarda, bilim berý uıymdarynda, sondaı-aq áýejaılarda, vokzaldarda qaýipsizdikti qamtamasyz etýge arnalǵan.
Osy júıeniń kómegimen ishki ister organdarynyń qyzmetkerleri ártúrli jaǵdaılardy baqylap, ýaqtyly áreket ete alady.
