Qazaqstandyqtar qaı eldiń alaıaqtaryna jıi aldanady
ASTANA. KAZINFORM – Іshki ister mınıstrligi Krımınaldyq polıtsııa departamenti kıberqylmysqa qarsy kúres ortalyǵynyń bastyǵy Jandos Súıinbaı ortalyq kommýnıkatsııalar qyzmetinde ótken brıfıngide qazaqstandyqtardyń qaı eldiń alaıaqtaryna jıi aldanatynyn aıtty.
«Buǵan deıin ınternet alaıaqtyqqa baılanysty óndiriske alynǵan 158 myń istiń 93 myńy ashylmaı qalǵany týraly málimet aıtyldy. Onyń sebebi nede?» - dep surady jýrnalıst.
Іshki ister mınıstrliginiń ókili munyń sebebin Qazaqstan azamattary sheteldikterge jıi aldanatynymen baılanystyrdy.
«Iá, shynymen de aqparat tehnologııalaryn paıdalaný arqyly jasalatyn qylmystardyń ashylýyna baılanysty ondaı problemalyq máseleler bar. Onyń ishinde qylmyskerler shetelden áreket etedi. Sondyqtan olardy ashýdy qıyndyqtar týyndaıdy. Óıtkeni tirkelgen is boıynsha qońyraý túsken elderge resmı saýal joldanady», - degen Jandos Súıinbaı qazaqstandyqtarǵa qatysty ınternet alaıaqtyq faktisi jıi tirkeletin eldermen ózara is-qımyl týraly kelisimder jasalyp jatqanyn atap ótti.
BAQ ókili qazaqstandyqtar qaı eldiń alaıaqtaryna jıi aldanatynyn naqtylady.
«Qazaqstan azamattary orys tildi bolǵandyqtan kóbinese kórshiles elderdiń alaıaqtaryna jıi aldanady. Mysaly, Ýkraınada osyndaı toptar ustaldy. Basqa da kórshiles elder bar. Aǵylshyn tildi qazaqstandyqtar Qytaı, Úndistan sııaqty elderdiń alaıaqtaryna aldanady. Negizi alaıaqtardyń kóbi Ýkraınadan baılanysqa shyǵady», - dedi ІІM ókili.
