Qazaqstandyqtar ınternet alaıaqtyq kesirinen 13 mlrd teńgesinen aıyrylǵan

QR ІІM Krımınaldyq polıtsııa departamenti Kıberqylmysqa qarsy kúres ortalyǵynyń bastyǵynyń orynbasary Rústem Dúısetaev Qazaqstanda keń taraǵan ınternet alaıaqtyq túrlerin aıtyp berdi, dep habarlaıdy Kazinform.

«Jyl basynan beri azamattardy ınternet arqyly aldaýǵa baılanysty 15,5 myń qylmys tirkelgen. Bul áreketterdiń saldarynan zardap shekkenderge 13 mlrd teńge zalal kelgen. Áli de alaıaqtardyń eń kóp taralǵan ádisi — onlaın saýda. Onlaın saýdamen baılanysty 7 myń alaıaqtyq jasaldy», - dedi Rústem Dúısetaev mınıstrliktiń aptalyq brıfınginde.

Bankterde jáne mıkrokredıttik uıymdarda jalǵan onlaın qaryz rásimdeýdiń 1 600 faktisi tirkelgen.

Azamattar aqshany tez kóbeıtý úshin, olardyń kúmándiligine qaramastan ártúrli shemalarǵa qatysýdy jalǵastyrýda. Bir jyl ishinde 1200 qazaqstandyq osyndaı shemalardyń qurbany boldy, olar óz aqshalaryn jumys istemeıtin ınvestıtsııalyq jobalarǵa salǵan. Keı jaǵdaılarda osy maqsattar úshin nesıe alǵandar bar.

«Alaıaqtar iri kompanııalardyń, sonyń ishinde ulttyq kompanııalardyń, bankterdiń, krıptobırjalardyń atynan jalǵan saıt qurý arqyly azamattardy qyzyqtyrady. Bul rette «menedjerlermen» jáne «brokerlermen» barlyq qarym-qatynas onlaın rejımde, onyń ishinde messendjerler arqyly ótedi. Keıbir jaǵdaılarda alaıaqtar úlken somany tartý úshin bir rettik dıvıdend tóleıdi», - deıdi mınıstrlik ókili.

Fıshıngtik siltemelerdi jiberý arqyly azamattardyń shottarynan 1 myń urlyq jasalǵan.

«Bankter, quqyq qorǵaý organdary qyzmetkerleriniń atynan jasalatyn alaıaqtyq erekshe alańdaýshylyq týǵyzady. Osy tásilmen jyl basynan beri 3 myńnan astam qylmys jasalǵan. Alaıaqtar shottaǵy kúdikti operatsııalar nemese nesıe rásimdeý áreketi týraly habarlaıdy jáne banktiń alaıaq qyzmetkerlerin ustaý boıynsha arnaıy operatsııa júrgizilip jatqanyn aıtady. Bank nemese polıtsııa qyzmetkerleri eshqashan derbes derekterdi suramaıtynyn jáne telefon arqyly arnaıy operatsııalar júrgizbeıtinin atap ótkim keledi», - dep túsindirdi R. Dúısetaev.

Mundaı qylmystardyń kópshiligi shetelden jasalady, bul olardyń jolyn kesý protsesin qıyndatady.