Qazaqstandyq taýar óndirýshilerge 30%-dyq mindetti avans tólenedi
ASTANA. KAZINFORM – Qarjy mınıstri Mádı Tákıev Úkimet otyrysynda Memlekettik satyp alý qaǵıdattaryna engizilgen ózgeristerdiń otandyq óndiristi qoldaýǵa tıgizetin septigi týraly málimet berdi.
«Qoldanystaǵy memlekettik satyp alý jáne kvazımemlekettik sektordyń satyp alýy qaǵıdalaryna ózgerister engizildi. Onda mynalar kózdeledi:
- taýarlardy, jumystar men qyzmetterdi basymdyqpen otandyq taýar óndirýshiler tizilimindegi ónim berýshilerden satyp alý;
- otandyq taýar óndirýshige 30% mólsherinde mindetti avans tólenedi, bul bizdiń ónim berýshilerge sharttyq mindettemelerdi ýaqtyly jáne tıisinshe oryndaýǵa múmkindik beredi», - dedi vedomstvo basshysy.
Sondaı-aq, ol aıyppuldardy azaıtý jaǵynda da oń ózgeris bar ekenin aıtty.
«Otandyq taýar óndirýshiler úshin turaqsyzdyq aıybyn 10%-dan 3%-ǵa deıin tómendetý jolǵa qoıyldy. Bul da eleýli qoldaý sharasy bolyp esepteledi. Kvazımemlekettik sektordyń satyp alýlarynda offteık-kelisimsharttardy bir kózden satyp alý tásili arqyly iske asyrý kózdelip otyr. Atalǵan sharalar otandyq óndiristi yntalandyrýǵa jáne retteletin satyp alýlardaǵy qazaqstandyq qamtý úlesin qamtamasyz etýge baǵyttalǵan», - dedi Mádı Tákıev.
