Qazaqstandyq taekvondoshylar Qytaıdaǵy halyqaralyq týrnırge qatysady

ASTANA. KAZINFORM — Taekvondodan Qazaqstan ulttyq quramasy Qytaıdyń Taıan qalasynda ótetin halyqaralyq «President’s Cup-Asia» jarysyna attandy.

Halyqaralyq týrnır 23-24 sáýir kúnderi ótedi. Álemdik básekege Azııa elderimen qatar Aýstralııa jáne Frantsııa sportshylary keledi.

Esbol Sultanov shákirtteri bul jarysqa Ózbekstan astanasy Tashkent qalasynda daıyndaldy. Olar atalǵan týrnırden ózge «Spanish Open G1» jáne «Austrian Open» jarystaryna ázirligin pysyqtady. 

Halyqaralyq oqý-jattyǵý jıynynda qazaqstandyq sportshylar Ózbekstan, Iordanııa, Qytaı, Belarýs, Grýzııa, Týnıs jáne Saýd Arabııasynyń taekvondoshylarymen tájirıbe almasty. 
Qytaıdaǵy týrnırde elimizdiń atynan 59 sportshy saıysqa túsedi.

Eske salsaq, bıyl taekvondodan Qazaqstan quramasynyń bas bapkeri qyzmetine Esbol Sultanov taǵaıyndaldy. Qazaqstandyq jankúıerler ony Týnıs quramasynda qyzmet atqarǵanyn kezinen jaqsy biledi. Ol atalǵan elde 2023 jyldan beri eńbek etti. 2024 jyly Parıj Olımpıadasynda ol tálim úıretken Fıras Katýssı altyn alsa, Mohamed Halıl Djendýbı qola júldege qol sozdy.