Qazaqstandyq stýdent halyqaralyq baıqaýda júldeli orynǵa ıe boldy
ASTANA. KAZINFORM — Býdapeshttiń Majarstan bı ýnıversıtetinde ótken jas oryndaýshylarǵa arnalǵan halyqaralyq «Budapest Ballet Grand Prix 2025» baıqaýy óz máresine jetti. Dodada 21 elden kelgen 77 bıshi óner kórsetti. Bul týraly QR Mádenıet jáne aqparat mınıstrligi habarlady.
Qazaqstan atynan baıqaýǵa Qazaq ulttyq horeografııa akademııasy kolledjiniń 1-kýrs stýdenti Ábilmansur Syrmanov qatysyp, Junior sanatynda úshinshi dárejeli júlde laýreaty atandy.
BBGP baıqaýynyń maqsaty — talantty jas oryndaýshylardy qoldaý, olardyń kásibı damýyna jaǵdaı jasaý jáne halyqaralyq sahnada tájirıbe almasýǵa múmkindik berý.
Qatysýshylardyń jumysyna álemdik balet óneriniń tanymal sheberleri engen halyqaralyq qazylar alqasy baǵa berdi.
Ábilmansur Syrmanov júldeli orynmen qatar, birneshe arnaıy marapatqa ıe boldy. Ol Majarstan bı ýnıversıtetiniń «Bı ártisi» bakalavrıat baǵdarlamasyna tegin oqýǵa shaqyrtý aldy. Sondaı-aq Brno qalasynda ótetin eýropalyq bı baıqaýyna qatysý usynylyp, uıymdastyrýshylar barlyq shyǵyndy ózderi kóteretinin jetkizdi. Buǵan qosa, jas bıshi Norvegııa ulttyq baleti 2 jáne Drezdendegi Semperoper Ballet trýppalaryna bir aptalyq taǵylymdamadan ótýge shaqyrtý aldy.
Jas ónerpazdy baıqaýǵa klassıkalyq bı pedagogy Áset Murzaqulov daıyndady.
Aıta keteıik, Abaı oblysynyń teatrlary eki birdeı halyqaralyq baıqaýda top jardy.