Qazaqstandyq startap Digital Bridge-de zaǵıptarǵa arnalǵan sheshim usyndy
ASTANA. KAZINFORM – Digital Bridge 2025 tehnologııalyq forýmynda zaǵıp jandarǵa tsıfrlyq qupııalylyq pen qyzmetterge teńdeı qoljetimdilikti qamtamasyz etetin tehnologııa usynyldy. Bul týraly Úkimettiń baspasóz qyzmeti habarlady.
Astana Hub-ta bastaý alǵan PocketDot jobasy — Memleket basshysynyń ınklıýzıvti qoǵam qurý jónindegi saıasatyn naqty is júzinde asyrýdyń kórinisi.
Bul qurylǵy zaǵıp jandardyń telefon paıdalaný kezinde tap bolatyn negizgi máseleni sheshýge kómektesedi, ol — qupııalylyqtyń bolmaýy. Olardyń qazir qoldanyp júrgen «daýystyq kómekshileri» messendjerlerde hat almasý, banktik operatsııalar nemese onlaın satyp alý kezderinde bolsyn barlyq jeke aqparatty estirtip aıtady. Al PocketDot qurylǵysy smartfonǵa qosylyp, mátindi Braıl qarpimen terýge jáne oqýǵa múmkindik beredi, ıaǵnı is júzinde paıdalanýshy úshin taktıldi ekrannnyń qyzmetin atqarady.
— Zaǵıp jandardyń kóptegen oı-pikirlerin tyńdaǵannan keıin biz olardyń telefondy syrt kózden jabyq ustaǵysy keletinin túsindik. Sodan soń uıaly telefonnyń bir bóligi sekildi, ári olarǵa óz betinshe oqyp-jazýǵa múmkindik beretin nárse jasaý ıdeıasy paıda boldy. Bul telefonnyń barlyq fýnktsııalaryna qol jetkizýge múmkindik beredi, máselen WhatsApp pen Telegram-da habarlasýǵa, aqsha aýdarymdaryn jasaýǵa, onlaın kýrstar oqýǵa, tipti Instagram-daǵy sýretterdi mátinge aınaldyrýǵa bolady, — dep atap ótti PocketDot kompanııasynyń negizin qalaýshy Ádil Júsipov.
Aıta ketelik pılotsyz taksıler: otandyq IT-joba 2026 jyly iske qosylatyny týraly jazǵan edik.