Qazaqstandyq para taekvondoshylardyń daıyndyǵy qalaı
Qazaqstandyq para taekvondoshylar Paralımpıada oıyndarynyń 3 lıtsenzııasyna ıe boldy. Paralımpıada oıyndarynyń kvalıfıkatsııalyq reglamentine sáıkes K44 sanatynda 80 kg deıingi salmaq dárejesinde para taekvondoshy Nurlan Dombaev, +80 kg salmaqta Nyshan Ómiráli jáne -57 kg salmaqta Kámılıa Dosmalova bıyl Parıjde ótetin Paralımpıada oıyndaryna joldamaǵa qol jetkizdi, dep jazady Kazinform.
Sportshylarymyz álemdegi reıtıngtiń kórsetkishine sáıkes, top 20 úzdik sportshylar qataryna kirdi. Paralımpıadaǵa daıyndyqty bastap ketken sportshylarmen az-kem áńgimelesken edik.
31 jastaǵy Kámılıa Dosmalova taekvondodan para sportshylar arasynda álemdik reıtıngte úshinshi orynda, Azııada birinshi orynda tur. Álem chempıonatynyń qola júldegeri, Azııa chempıonatynyń altyn júldegeri, 2023 jyly bolǵan Azııa oıyndarynda kúmis júldege ıe bolǵan. Akýsherlik travma dıagnozymen dúnıege kelgen batyr qyz sport pen ómirdi súıetinin aıtady. Bala kezinen taekvondomen aınalysatyn ol 2016 jyldan beri álemdik básekelerde kók týymyzdyń astynda óner kórsetip júr. Endigi armany – paralımpıada shyńyn baǵyndyrý.
«Paralımpıadaǵa daıyndyqty biraz jyldan beri jasap kele jatyrmyn. 2019 jyldan bastap Qazaqstan ulttyq quramasy qarjylyq qoldaý kórsetkendikten, bapkermen birge júıeli túrde daıyndyq júrgizip, qatysa bastadym. Jeke bapkerimmen birge Parıjde ótetin paralımpıadaǵa arnaıy baǵdarlama jasap, daıyndyqty bastap kettik. Shet memlekettiń sportshylarymen qosylyp, birge daıyndalsaq pa dep josparlap otyrmyz. Barlyq másele qarjyǵa kelip tireledi. Biz lıtsenzııa aldyq, degenmen Parıjde babymyzda bolý úshin alda bolatyn baıraqty básekelerdiń barlyǵynda baq synaýǵa tyrysatyn bolamyz. Alda Azııa chempıonaty, Iran Prezıdentiniń chempıonaty bolady», - dedi ol.
43 jastaǵy Nurlan Dombaevtyń bul birinshi paralımpıadasy emes. Túrkııada ótken Paralımpıadada jaraqat alyp, sátti óner kórsete almaǵanyn aıtady. Ol 14 jasynda toqty abaısyz ustap qalyp, eki qolynan aıyrylǵan.
«Osy Paralımpıadada ótken qatelikterden sabaq alyp, ony qaıtalamaımyn dep bekinip otyrmyn. Eki dúrkin Álem chempıony boldym, úsh dúrkin Azııa chempıonymyn. Qazir qyzý daıyndyq ústindemin. Alda bolatyn týrnırlerge, chempıonattarǵa qatysatyn bolamyn. Azııa chempıonatyna baryp, daıyndyqta shyńdalyp alý oıda bar», - dedi Nurlan.
Aıta keteıik, Tokıo-2020 Paralımpıada oıyndarynda Qazaqstan ulttyq quramasy 25 sportshymen baryp, 5 medal (1 altyn, 3 kúmis jáne 1 qola) jeńip alyp, jalpy komandalyq 48-orynǵa ıe boldy.
