Qazaqstandyq oqýshy jasandy ıntellekt arqyly qaterli isikti anyqtaıtyn júıe oılap tapty
ASTANA. KAZINFORM — AQSh-tyń Fınıks qalasynda ótken bedeldi Regeneron ISEF 2026 halyqaralyq ǵylymı-ınjenerlik kórmesinde tarazdyq 11-synyp oqýshysy Arnur Artyqbaı júldeli orynǵa ıe boldy.
Jasandy ıntellekt negizinde onkologııalyq jáne ókpe aýrýlaryn erte dıagnostıkalaý júıesin ázirlegen otandyq jas zertteýshi Saýd Arabııasyndaǵy jetekshi joǵary oqý ornynyń bilim grantyn ıelendi. Bul týraly ol Jibek Joly telearnasynyń «Búgin.LIVE» baǵdarlamasynda aıtyp berdi.
Jas ǵalymnyń aıtýynsha, jobany ázirleý ıdeıasy medıtsınalyq mekemelerdegi dıagnostıkalyq aqparattyń jetkiliksizdigi men taldaý protsesiniń uzaqtyǵyn zertteý barysynda týyndaǵan. Onyń jasaǵan júıesi tek qaterli isikti ǵana emes, sonymen birge basqa da kúrdeli ókpe aýrýlaryn anyqtaýǵa qaýqarly. Júıe MRT jáne rentgen sýretterin taldaý negizinde jumys isteıdi.
— Medıtsınalyq ortalyqtardaǵy derekterdi zertteı kele, aqparattyń jetkiliksizdigin baıqadym. Men ázirlegen algorıtm aýrýlardy joǵary dáldikpen anyqtaıdy. Búginde dárigerler úshin ár sýretke taldaý jasaý, analız júrgizý kóp ýaqytty qajet etedi. Bul joba sol protsesti tolyqtaı avtomattandyrýǵa múmkindik beredi. Alaıda bul kezeńde tehnologııaǵa 100 paıyz senip qalýǵa bolmaıdy, sondyqtan men bul júıeni dárigerlerge taptyrmas jáne senimdi kómekshi qural retinde qarastyramyn, — deıdi Arnur Artyqbaı.
Joba oqý jylynyń basynda, ıaǵnı jaz aılarynan bastap qolǵa alynǵan. Jetekshisi Meıirlan Tólegenuly mektep, jergilikti, qalalyq jáne respýblıkalyq kezeńderde birinshi oryn ıelenip, Qazaqstan ulttyq quramasynyń sapynda AQSh-taǵy halyqaralyq kórmege joldama alǵanyn aıtty.
— Málimettermen, medıtsınalyq derektermen jumys isteý kezeńi óte qıyn boldy. Aýrýhanalarǵa arnaıy baryp, rentgen jáne MRT snımoktaryn surap, olardy tereń zertteýge týra keldi. Endigi negizgi maqsat — bul jobany qaǵaz júzinde qaldyrmaı, ónimge aınaldyrý. Biz mektep deńgeıinde zertteý jasaǵandyqtan, muny ári qaraı damytý úshin joǵary oqý oryndarymen birlesip jumys isteý nemese ınvestorlar tabý qajet. Medıtsına — adam ómirimen tikeleı baılanysty óte sezimtal sala bolǵandyqtan, qoldaý tapqan jaǵdaıda jobany klınıkalyq qoldanysqa engizýge bolady, — deıdi joba jetekshisi.
Eske sala keteıik, Regeneron ISEF — jyl saıyn daryndy mektep oqýshylary arasynda ótetin álemdegi eń iri halyqaralyq ǵylymı-ınjenerlik kórme.
Oǵan jyl saıyn álemniń 80-nen astam elinen myńdaǵan jas zertteýshiler qatysyp, óz jobalaryn qorǵaıdy.
Buǵan deıin, Densaýlyq saqtaý mınıstri Aqmaral Álnazarova onkologııany erte kezeńde anyqtaý 35 paıyzǵa deıin óskenin aıtqan edi.
