Qazaqstandyq muǵalimder álemde úzdik atana ala ma
ASTANA. KAZINFORM – Oqý jyly aıaqtalyp, bilim salasynyń qorytyndysy shyǵarylyp jatqany belgili. Bul rette, Oqý-aǵartý mınıstrligi tórt toqsan boıy oqýshylardyń bilimin arttyrýǵa ólsheýsiz úles qosqan muǵalimderdi yntalandyrýǵa nıetti. Atap aıtsaq, bıyl «Qazaqstan muǵalimi» ulttyq syılyǵynyń qory 20 mıllıon teńgege deıin artyp otyr.
Bul biregeı is-shara muǵalimderdiń kórnekti jetistikterin atap ótýge, shyǵarmashylyq áleýetin yntalandyrýǵa jáne búkil Qazaqstan boıynsha oqytýdaǵy jańa quzyretter men múmkindikter qalyptastyrýǵa arnalǵan.
Belgili bolǵandaı, jeńimpazǵa 10 mıllıon teńge buıyrmaq. Fınalǵa ótken qatysýshylar da oljasyz qalmaıdy. Olardyń árqaısysyna 1 mln teńge tabystalady. Budan bólek fınalıster júlde qory 1 mln dollardy quraıtyn «Álem Muǵalimi» jahandyq syılyǵyna úmitker bola alady. Sonymen qatar, álemdik bilim berý qaýymdastyǵymen óz ádisteri men ınnovatsııalaryn bólisýge múmkindik beretin medıa tarapynan keń qoldaýǵa ıe bolady.
«Qazaqstan muǵalimi» ulttyq syılyǵyna bastaýysh jáne orta mekteptiń muǵalimderi qatysa alady. Ótinish berý 2024 jyldyń 22 sáýirinen 22 maýsymyna deıin jalǵasatynyn eske salǵan jón. Úmitkerler barlyq sharttarmen https://www.teachers-summit.org saıtynan tanysa alady.
Bıyl «Qazaqstan muǵalimi» ulttyq syılyǵynyń basty uıymdastyrýshysy Inclusive Development Foundation korporatıvtik qory bolyp tabylady. Oqý-aǵartý mınıstrligi men Global Teacher Prize ulttyq syılyqty resmı túrde qoldap otyr.
Aıta keteıik, buǵan deıin Qazaqstan muǵalimderi álemniń TOP-50 muǵaliminiń qataryna eki márte engen.
