Qazaqstandyq kolledjde jasandy ıntellekt zerthanasy ashylady
ASTANA. KAZINFORM — Qazaqstandyq kolledjder men Qytaıdyń Zhejiang College of Security Technology oqý orny mańyzdy strategııalyq kezdesý ótkizdi. Taldyqorǵan joǵary polıtehnıkalyq kolledjinde jasandy ıntellekt (AI) zerthanalaryn ashý jáne jańa «Jasandy ıntellekt» mamandyǵyn engizý týraly ýaǵdalastyqqa qol jetkizildi.
Kezdesý barysynda taraptar tsıfrlyq bilim berý salasyndaǵy yntymaqtastyqty keńeıtý, zamanaýı tehnologııalar boıynsha tájirıbe almasý jáne birlesken jobalardy damytý baǵyttaryn talqylady.
— Bul yntymaqtastyqtar aıasynda akademııalyq utqyrlyq baǵdarlamalary iske qosylyp, stýdentter men oqytýshylardyń tájirıbeden ótýi men almasý múmkindikteri keńeıtiledi. Sonymen qatar birlesken bilim berý jáne ǵylymı jobalardy júzege asyrý josparlanyp otyr, — deıdi Oqý-aǵartý mınıstrliginiń Tehnıkalyq jáne kásiptik bilim departamenti basshysynyń orynbasary Aqzıra Qasymova.
Oqytýshylardyń biliktiligin arttyrýǵa, jasandy ıntellekt salasyndaǵy quzyretterdi damytýǵa jáne halyqaralyq bilim berý standarttaryn engizýge erekshe kóńil bólinedi. Bul áriptestik Qazaqstan men Qytaı arasyndaǵy bilim berý baılanystaryn nyǵaıtyp, eki eldiń stýdentteri úshin jańa kásibı jáne oqý múmkindikterin ashady.
Aıta ketelik Coursera platformasy 200 myńǵa jýyq qazaqstandyq stýdentke sertıfıkat tabystaǵan.