Qazaqstandyq klýbtar fýtzaldan Chempıondar lıgasy 1/4 fınalynda qarymta oıyndar ótkizedi

ASTANA. KAZINFORM - 25 naýryzda fýtzaldan UEFA Chempıondar lıgasynyń 1/4 fınaldyq kezeńinde qazaqstandyq «Semeı» men «Qaırat» komandalary qarymta oıyndaryn ótkizedi.

Semeılik komanda saǵat 20:00-de óz alańynda Frantsııanyń «Etýal» klýbymen kezdesse, 00:30-da almatylyq klýb syrt alańda Ispanııanyń «Kartahena» klýbymen sheberlik baıqasady.

Eki kezdesý de «Qazsport» telearnasynan tikeleı efırde kórsetiledi.

Aıta ketsek, «Semeı» 1/4 fınaldyń alǵashqy oıynynda qarsylasyna 4:5, «Qaırat» ıspanııalyq klýbqa 1:2 esebimen jeńilip qaldy.

Oǵan deıin 1/8 fınalda «Qaırat» Belgııanyń «Anderleht» klýbyn (7:3, 5:3) qapy qaldyrsa, «Semeı» Polshanyń «Pıast» komandasyn (3:3, 5:3) jeńip, kelesi kezeńge shyqty.

Bıyl fýtzaldan Chempıondar lıgasynyń elıtalyq kezeńine ózgerister engizildi. Jarystyń atalǵan satysynda 16 komanda segiz jupqa bólindi. Komandalar 2025 jyldyń 24 qarasha-6 jeltoqsan aralyǵynda óz alańynda jáne syrt alańda bir-bir kezdesýden ótkizdi.

Endi 2026 jyldyń 23 aqpany men 6 naýryzy aralyǵynda komandalar sol ereje boıynsha shırek fınalda synǵa túsedi. Fınal 2026 jyldyń mamyr aıynda Italııanyń Pesaro qalasynda ótedi. Onda tórt komanda sheberlik baıqasady. Aldymen jartylaı fınal bolsa, odan keıin fınal men 3-oryn úshin oıyndar ótkiziledi.