Qazaqstandyq kınoger Londonda top jardy
LONDON. KAZINFORM — Qazaqstandyq kórkem týyndy Londonda ótken Eýrazııalyq fılmder festıvalinde laýreat atandy. Rejısser Kamıla Saǵyntqannyń shyǵarmasy “Eń úzdik qysqametrajdy fılm” atalymy boıynsha júzden júırik dep tanyldy, dep habarlaıdy Kazinform-nyń Tumandy Albıondaǵy menshikti tilshisi Ǵalymjan Qaramanuly.
Kamıla Saǵyntqannyń “Táýelsizdik kúni qutty bolsyn” fılmi súıgen jary baqılyq bolyp, ómirdiń mánin joǵaltqan orta jastaǵy er kisi týraly. Marattyń jańa qoǵamǵa kóńili tolmaıdy, biraq túrli kedergilerge qaramastan tyǵyryqtan shyǵýdyń jolyn izdeıdi. Otandyq ónim sarapshylar men kórermenderdiń joǵary baǵasyna ıe boldy.
“Fılmniń kórkemdik sheshimi ári qyzyqty mazmuny, qysqa ýaqyttyń ishine biraz mańyzdy dúnıeni syıǵyza alǵany unady. Eksperımenttik elementteri de kóńilden shyqty. Baıqaýǵa qatysýshy basqa básekelesterine qaraǵanda oq boıy ozyq boldy”, deıdi qazylar alqasynyń múshesi Tımýr Ahmedjanov.
Eýrazııalyq shyǵarmashylyq gıldııasy kommertsııalyq emes uıymy uıymdastyrǵan kınofestıval bıyl altynshy ret ótkizilip otyr. Oǵan qatysýǵa 22 elden 100-ge jýyq úmitker nıet bildirgen. Іshinen 20-sy iriktelip alynyp, báıgege tústi.
“Ortalyqazııalyq kınogerlerdiń senimdiliginiń nyǵaıa túskeni seziledi. Olar shyǵarmashylyqtaryn shyńdap, batys kórermenine bir qadam jaqyn bola tústi. Ómirimizge basqa qyrynan qaraýǵa múmkindik bergeni qýantady”, deıdi sarapshy Djon Farndon.
Kınofestıval jyl saıyn júzdegen talantty rejısser, akter, prodıýser jáne stsenarısterdiń basyn qosady. Sharany ótkizýdegi maqsat eýrazııalyq kınony aǵylshyn tildi keńistikte nasıhattaý. Ortalyq Azııa jáne postkeńestik kınoındýstrııa ókilderin dúnıejúzinen jınalǵan kásipqoılarmen tanystyrý.
“Ulybrıtanııa halqy bul fılmderdi eshqashan kórmes edi. Óıtkeni bizde Ortalyq Azııa óner týyndylary úshin naryq qalyptaspaǵan. Biz bul olqylyqtyń ornyn toltyrǵymyz keledi. Shyǵarmashylyq adamdaryn álemniń túkpir-túkpirinen jınaı alǵanymyzǵa rızamyz”, deıdi festıval uıymdastyrýshysy Spenser Hoýken.
Marapattaý saltanatynyń syıly qonaqtary qatarynda Londondaǵy Haverıng aýdanynyń meri, TMD memleketteri elshilikteriniń ókilderi boldy. Sharada Ulybrıtanııadaǵy Qazaq ortalyǵynyń ókili Kámshat Kúmisbaı áýeletip án shyrqady. Festıval uıymdastyrýshylary óner súıer qaýymdy jýyrda Býrabaıda ótetin qysqametrajdy kınonyń úshinshi halyqaralyq baıqaýyna shaqyrdy.
