Qazaqstandyq dárigerler robottyń kómegimen onlaın ota jasady
ALMATY. KAZINFORM – Almatydaǵy Qazaq onkologııa jáne radıologııa ǵylymı-zertteý ınstıtýty (QazORǴZI) robottandyrylǵan hırýrgııa boıynsha halyqaralyq tájirıbe almasýdyń alańyna aınaldy. Munda AQSh, Qytaı jáne Qazaqstan mamandarynyń qatysýymen onlaın ota jasalyp jatyr.
Іs-sharanyń basty taqyryby – robot-assıstentsııalyq radıkaldy prostatektomııa jáne nefrektomııa. Bul – onkologııalyq aýrýlardy emdeýdiń az ınvazıvti jáne joǵary tıimdi ádisi retinde álemde keńinen moıyndalǵan tásil.
Ota operatsııa bólmesinen tikeleı efırde kórsetiledi. Hırýrgter robottyq júıeni paıdalana otyryp, naqty ýaqyt rejıminde kúrdeli operatsııalardy birlese júzege asyryp jatyr.
Onkolog dáriger Áset Ahanulynyń aıtýynsha, búgingi ota robatty assıstentsııalyq operatsııa dep atalady. Onyń ereksheligi munda barlyq qımyl robattyń kómegimen júzege asyrylady. Al ony hırýrg dárigerler basqarady.
– Ota 3 eldiń qatysýymen qashyqtan jasalady. Úsh hırýrg bul otany bóliske salady. Qazirgi kezde bul naýqasqa birinshi satydaǵy kóposhaqty obyr dıognozy qoıylǵan. Bizdiń maqsatymyz – ishki organdy saqtap qalyp, obyrdy alyp tastaý. Mundaı operatsııalar aldaǵy ýaqytta da jalǵasyn tabady, - dedi Áset Ahanuly.
Mamandardyń aıtýynsha, mundaı tehnologııa operatsııanyń dáldigin arttyryp, qan joǵaltýdy azaıtady, asqyný qaýpin tómendetedi. Sonymen qatar naýqastyń aýrýhanada jatý merzimi qysqarady.
Іs-shara barysynda úsh eldiń jetekshi hırýrgteri ota kezeńderin birlesip talqylap, tájirıbe almasady. Onlaın-translıatsııaǵa eldegi barlyq onkologııalyq ortalyq qosylǵan. Bul onkolog dárigerlerdi jańa tehnologııalarmen tanystyryp, kásibı yntymaqtastyqty arttyrýǵa múmkindik bermek.
Aıta keteıik, osyǵan deıin qaterli isik ne sebepti qarqyn alǵany týraly jazǵanbyz.