Qazaqstandyq búrkitshiler Mońǵolııada júlde aldy
ASTANA. KAZINFORM - Mońǵolııa Respýblıkasynyń Baıan-Ólgeı aımaǵynda dástúrli Dúnıejúzilik «Búrkitshiler toıy» aıasynda ІІІ Azııa chempıonaty ótti, dep habarlaıdy Abaı oblysy ákimdiginiń baspasóz qyzmeti.
Baıraqty básekede Qazaqstan Respýblıkasynyń qusbegilik sportynan ulttyq quramasy joǵary nátıje kórsetip, júldeli oryndarǵa ıe boldy.
36 jyldyq tarıhy bar halyqaralyq doda Mońǵolııanyń mádenı brendine aınalǵan. Ol jyl saıyn álemniń túkpir-túkpirinen myńdaǵan týrıst pen búrkitshi qatysatyn erekshe mereke. Qazaq qusbegilerin bul jarysqa memlekettik jattyqtyrýshylar Armanbek pen Bazarbek Kúntýǵan bastap bardy.
Jalpy chempıonatqa 60-tan astam qusbegi qatysyp, «qolǵa shaqyrý» jáne «shyrǵa tartý» saıystary boıynsha synǵa tústi.
Qazaqstan ulttyq quramasy sapynda el namysyn qorǵaǵan Abaı oblysynyń búrkitshisi Táttimbet Kápuly «Qarager» atty qyran qusymen júldeli úshinshi oryndy, al atyraýlyq qusbegi Arman Qoshqarov «Ańyraqaı» atty búrkitimen ekinshi oryndy ıelenip, el abyroıyn asqaqtatty.
Osyǵan deıin Shyǵys Qazaqstanda halyqaralyq búrkitshiler festıvali ótetini týraly habarladyq.