Qazaqstandyq bitimgerlerdi Golan bıigine shyǵaryp salý rásimi ótti
ASTANA. KAZINFORM - 28 gvardııashy-panfılovshylar atyndaǵy saıabaqta QR Qarýly kúshteriniń bitimgerlik kontıngentin «BUU-nyń Golan bıiktikterindegi bólinýdi baqylaý jónindegi kúshteri» mıssııasyna saltanatty túrde shyǵaryp salýǵa arnalǵan is-shara ótti.
Alańǵa Qorǵanys mınıstrliginiń basshylyǵy, áskerı qyzmetshilerdiń týǵan-týystary men áriptesteri, Parlament depýtattary, atqarýshy bılik organdary men ardagerler uıymdarynyń, «Jas-sarbaz» áskerı-patrıottyq qozǵalysynyń ókilderi jınaldy.
Qorǵanys mınıstri general-polkovnık Rýslan Jaqsylyqov qazaqstandyq bitimgerlerdiń BUU mıssııalaryna qatysý geografııasy men ártaraptandyrylýyn keńeıtý Prezıdenttiń nusqaýy boıynsha júzege asyrylyp jatqanyn atap ótti.
– Bul biz úshin úlken mártebe, óıtkeni qysqa merzim ishinde áskerı-saıası jaǵdaıdaǵy erekshe tapsyrmalardy oryndaýǵa daıyn, barlyq halyqaralyq standarttar men talaptarǵa sáıkes keletin bitimgerlik kontıngentti daıyndap, jaraqtaı aldyq, – dep atap ótti ol.
Qorǵanys vedomstvosynyń basshysy BUU men halyqaralyq qoǵamdastyqtyń memleketimiz ben onyń Qarýly kúshteriniń beıbitshilik pen qaýipsizdikti saqtaý jónindegi eń jaýapty mindetterdi oryndaý qabiletin moıyndaýynyń kórsetkishi ekenin atap ótti.
– Sonymen qatar bul elimiz ben álemdik qoǵamdastyq aldyndaǵy úlken jaýapkershilik. Sondyqtan biz daıyndyqtyń, tártiptiń joǵary deńgeıin kórsetip, halyqaralyq arenada Qazaqstan Respýblıkasy men onyń Qarýly kúshteriniń bedelin joǵary kóterýimiz kerek, – dep túıindedi ol.
Jıynda sóz alǵan Parlament Májilisiniń depýtattary Konstantın Avershın men Bolat Kerimbek bitimgerlerge aq jol tiledi.
General-polkovnık Rýslan Jaqsylyqov kontıngent komandıri podpolkovnık Jiger Aıpovqa Qazaqstan Respýblıkasynyń Memlekettik Týyn tabys etti. Áskerı qyzmetshiler onda jetken soń bizdiń memleketimizdiń nyshany Golan bıiktikterindegi qazaqstandyq bitimgerlik bazanyń aýmaǵyna ilinetin bolady.
Podpolkovnık Jiger Aıpov atap ótkendeı, bitimgerlik kontıngenttiń jeke quramy keshendi bitimgerlik daıyndyqtan ótti jáne BUU mıssııasynyń mandaty sheńberinde júktelgen mindetterdi oryndaýǵa daıyn.
Esterińizge sala keteıik, 2014 jyldan bastap 67 qazaqstandyq ofıtser BUU-nyń Batys Sahara, Kot-d ' Ivýar, Malı, Ortalyq Afrıka Respýblıkasy jáne Lıvandaǵy mıssııalaryna áskerı baqylaýshylar men shtab ofıtserleri retinde qatysyp keledi.
2018 jyldan beri 538 qazaqstandyq áskerı qyzmetshi bitimgerlik bólimshe quramynda «BUU-nyń Lıvandaǵy ýaqytsha kúshteri» mıssııasyna qatysty.
Qazirgi ýaqytta Batys Saharada 6, Ortalyq Afrıka Respýblıkasynda 2, Kongo Demokratııalyq Respýblıkasynda 2, Lıvanda 9 ofıtser BUU-nyń mıssııalarynda qyzmet etýde. Golan bıikterine 139 qazaqstandyq áskerı qyzmetshi jiberildi. Olar onda mıssııa mandatyna sáıkes, qarama-qarsy taraptar arasynda atysty toqtatý rejımin qoldaý jónindegi mindetterdi oryndaıtyn bolady.
