Qazaqstandyq baılanys spýtnıkteriniń jańa legi bolýy tıis – depýtattar
QR Parlament Senatynyń depýtattary Respýblıkalyq ǵaryshtyq baılanys ortalyǵynyń (RǴBO) mamandarymen kezdesip, ózekti máselelerdi talqylady, dep habarlaıdy Kazinform.
Senattyń Halyqaralyq qatynastar, qorǵanys jáne qaýipsizdik komıtetiniń depýtattary Aqmola oblysynyń Aqkól qalasynda ornalasqan «Aqkól» ǵaryshtyq baılanys ortalyǵynyń jumysymen tanysý maqsatynda kóshpeli otyrys ótkizdi. Elimizdi baılanyspen qamtamasyz etetin «Kazsat» qazaqstandyq spýtnıkterine basqarý dál osy jerden júrgiziledi.
Munda at basyn burǵan Senat komıtetiniń tóraǵasy Andreı Lýkın depýtattardyń issaparynyń maqsatyna toqtaldy. Ulttyq ǵaryshtyq baılanys júıesin damytý, spýtnıkterdiń tıimdi jumysy, barlyq qazaqstandyqty sapaly ınternetpen qamtamasyz etý úshin qandaı qoldaý qajet – depýtattar tanyspaq bolǵan suraqtar osy. Senatorlar jaqynda ótken «Digital Bridge» tehnologııalyq forýmynda Memleket basshysy Qasym-Jomart Toqaev júktegen tapsyrmalar legin eske saldy. Atap aıtqanda, Prezıdent Úkimettiń aldyna 2025 jylǵa deıin elimizdiń barlyq oblys ortalyǵyn jańa býyndy uıaly baılanyspen qamtý jumysyn jedeldetýdi tapsyrǵan bolatyn.
«Búginde 6 200-ge jýyq aýyl bar. Sonyń 3 myńyn 2027 jylǵa deıin qoljetimdi ınternetpen qamtamasyz etýimiz kerek. Ol úshin ınfroqurylymdy damytý mańyzdy. Jaqynda ǵana Prezıdenttiń qatysýymen jıyn ótti. Onda osy máselelerdiń barlyǵy kóterildi, naqty tapsyrma júkteldi. Oǵan saı, Tsıfrlyq damý, ınnovatsııalar jáne aeroǵarysh ónerkásibi mınıstrligi arnaıy ulttyq joba daıyndady», - dedi Senat depýtaty Ǵalıasqar Sarybaev.
Senatorlarǵa baılanys monıtorıngi ortalyǵy júıesiniń tehnıkalyq jaraqtandyrylý deńgeıi jaıly aqparat usynyldy. Búgingi tańda RǴBO qyzmetterin 17 baılanys operatory paıdalanady. Olardyń ishinde «Astel» AQ, «Qazteleradıo» AQ, «Kar-Tel» JShS, «Qazaqtelekom» AQ, «Almatelekommýnıkeıshns» JShS sııaqty kompanııalar bar.
Ortalyqta depýtattar táýlik boıy onlaın rejıminde jumys isteıtin «Kazsat-2», «Kazsat-3» spýtnıkterimen baılanys seansyn tamashalady.
«Búginde álemde 200-ge jýyq memleket bar. Sol elderdiń barlyǵynyń osyndaı spýtnıkteri joq. Aldyńǵy qatarly 11 derjavada ǵana spýtnıkter bar. Osy elderdiń qataryna Qazaqstannyń kirýi – orasan jetistik. Bizdiń «Kazsat-1» óziniń resýrsyn taýysty. «Kazsat-2», «Kazsat-3» jumys istep jatyr. Bolashaqta «Kazsat-3R» keshenin qurý úshin jumystardy qolǵa alýymyz kerek. ıAǵnı, ol 2027 jyldan bastap jumys isteýi tıis», - dedi Ǵalıasqar Sarybaev.
RǴBO AQ basqarma tóraǵasy Málik Júıriktaev depýtattarǵa Qazaqstannyń tuńǵysh Ulttyq ǵaryshtyq baılanys jáne habar taratý júıesi eki baılanys spýtnıgi arqyly jumys istep turǵanyn aıtty. Negizgi basqarý Aqmola oblysyndaǵy «Aqkól» ǵaryshtyq baılanys ortalyǵynan júrgiziledi. Al rezervtik basqarý Almaty oblysyndaǵy «Kókterek» ǵaryshtyq ortalyǵynda ornalasqan.
«RǴBO operator retinde eldiń telehabar taratý, baılanys, ınternet jelisine qajettiligin 100% qamtamasyz etedi. Qazaqstannyń ǵaryshtyq baılanysy – bul el operatorlary úshin ǵaryshtyq baılanys qyzmetterin usyný ǵana emes, sonymen qatar memlekettiń aqparattyq derbestigin qamtamasyz etý, el ekonomıkasyna naqty úles qosý», - dep atap ótti RǴBO AQ basqarma tóraǵasy Málik Júıriktaev.
Búginde Qazaqstan aýmaǵynda ǵaryshtan sıgnal qabyldaıtyn 15 myńnan astam stantsııa bar. Bizdiń spýtnıkterdiń qyzmetin Tájikstan men Qyrǵyz Respýblıkasynyń operatorlary da paıdalanady.
Buǵan deıin jetý qıyn qala men aýyldardy spýtnık arqyly tikeleı baılanyspen qamtý jónindegi pılottyq joba iske qosylǵan edi. Osynyń nátıjesinde 504 eldi mekenniń 176-sy ınternetke qol jetkizdi.
Kóshpeli otyrys barysynda depýtattar Aeroǵarysh komıtetiniń tóraǵasy Baýbek Oralmaǵambetovke «Baıqońyr» kesheniniń jumys isteýi, Qazaqstannyń ǵarysh salasyn damytýdyń perspektıvalyq jáne problemalyq máseleleri boıynsha suraq qoıdy. Jıyndy qorytyndylaı kele, senatorlar RǴBO-nyń aýyldardy ınternetpen qamtamasyz etý máselesin jedel sheshýge qatysýy mańyzdy ekenin atap ótti. Bul baǵytta depýtattar qoldanystaǵy zańnamany jetildirý isine járdemdespek.