Qazaqstandaǵy úzdik medıtsınalyq JOO-lar belgili boldy
Densaýlyq saqtaýdy damytý respýblıkalyq ortalyǵy 2018 jyly medıtsınalyq joǵary oqý oryndarynyń, ǵylymı-zertteý ınstıtýttary jáne ǵylym men ınnovatsııalyq ǵylymı ortalyqtardyń reıtıngin jasaǵan bolatyn.
«Ǵylymı uıymdardy baǵalaǵan kezde mynadaı kórsetkishter eskeriledi: ǵylymı zertteýler kólemi, halyqaralyq sarapshylardyń maqalalary boıynsha jarııalanymdar sany, qazaqstandyq avtorlar jumystarynyń siltemeler sany, qaýipsizdik qujattarynyń sany, ǵylymı ázirlemeler, kommertsıalızatsııalaý deńgeıinde alynǵan nátıjelerdi jáne olardy praktıkalyq densaýlyq saqtaýda engiziý, sondaı-aq halyqaralyq konferentsııalarǵa qatysý» delingen habarlamada.
Medıtsınalyq joǵary oqý oryndarynyń reıtıngisinde qyzmetkerlerdiń ǵylymı qyzmeti boıynsha birinshi oryndy Ulttyq medıtsına ýnıversıteti (burynǵy S. Asfendııarov atyndaǵy Qazaq ulttyq medıtsına ýnıversıteti) ıelense, ekinshi orynǵa Qaraǵandy medıtsınalyq ýnıversıteti jaıǵasty. Al úshinshi orynda - Ońtústik Qazaqstan medıtsınalyq akademııasy.
Stýdentterdiń ǵylymı jumystaryna sáıkes, kóshbasshy - Semeı medıtsına ýnıversıteti, ekinshi orynǵa Batys Qazaqstan medıtsına ýnıversıteti laıyq dep tanyldy. Al úshinshi oryn Qaraǵandy medıtsınalyq ýnıversıtetiniń enshisinde.
ǴZI men ǴO arasynda úzdik atanǵandar: Radıatsııalyq medıtsına jáne ekologııa ǵylymı-zertteý ınstıtýty (1-oryn), Qazaq onkologııa jáne radıologııa ǵylymı-zertteý ınstıtýty (2-oryn) jáne Ulttyq ǵylymı medıtsınalyq ortalyq (3-oryn).
M.Áıkimbaev atyndaǵy Karantındik jáne zoonozdyq ınfektsııalardyń ǵylymı-zertteý ortalyǵy klınıkalyq emes ǵylymı uıymdar arasynda eń úzdik dep tanyldy. Respýblıkalyq densaýlyq saqtaýdy damytý ortalyǵy men QMÝ «Qoǵamdyq densaýlyq saqtaý joǵary mektebi» ekinshi jáne úshinshi oryndardy ıelendi.
Aıta keteıik, jyl saıyn júrgiziletin bul reıtıng 2016-2019 jyldarǵa arnalǵan «Densaýlyq» densaýlyq saqtaýdy damytý memlekettik baǵdarlamasy aıasynda otandyq medıtsına ǵylymy men ınnovatsııanyń sapasyn jáne básekege qabiletin arttyrýǵa baǵyttalǵan. Reıtıngtiń egjeı-tegjeıli nátıjelerin DSDRO saıtynan tabýǵa bolady.
