Qazaqstandaǵy TikTok: Bıylǵy jyldyń úzdikteri ataldy

ASTANA. QazAqparat – TikTok platformasy Qazaqstan boıynsha 2022 jyldyń qorytyndysyn shyǵardy. Oǵan sáıkes, bıyl elimizde atalǵan platformanyń mıllıondaǵan qoldanýshysynyń kóńilinen shyqqan jańa juldyzdar men trendter paıda boldy, dep habarlaıdy QazAqparat tilshisi.

TikTok-tyń Qazaqstandaǵy ókilderi bıyl eń kóp qaralym jınaǵan vıdeorolıkterdi iriktedi. Olardyń arasynda almatylyq sýretshi Ásel Sabyrjanqyzynyń sózderden Abaıdyń portretin salǵan vıdeosy men Elena Zolotýhınanyń týrnıkte oryndaǵyn trıýkteri bar. Sonymen qatar jas dombyrashylardyń ataqty «Adaı» kúıin oryndaǵan beınerolıgi eń kóp qaralym jınaǵan. Al almatylyq hımııa pániniń muǵalimi Ulan Úsenovtiń bilim berý baǵytyndaǵy kreatıvti vıdeolary jyl jańalyǵyna aınaldy. Sondaı-aq ol byltyr «Qazaqstannyń 100 jańa esimi» jobasynyń jeńimpazy atanǵan bolatyn.

«Biz ustazdar kúnine oraı QR Oqý-aǵartý mınıstrliginiń qoldaýymen #QazaqstanMuǵalimderi baıqaýyn bastadyq. Onda elimizdiń túkpir-túkpirindegi ustazdar qysqa beınerolıkter arqyly bilimdi kreatıvti túrde jetkizýge tyrysa bildi. Qazir heshteg 110 mıllıonnan astam qaralym jınady.

Sondaı-aq «KazakhTourism» kompanııasymen birge qolǵa alynǵan qazaqstandyqtardy týǵan elinde demalýǵa jáne saıahattaýǵa úndeý maqsatynda #TravelKazakhstan heshtegi qosyldy. Kontenttiń qaralym sany 20 mıllıonnan asty. Buǵan qosa, platforma QR Mádenıet jáne sport mınıstrligimen birlese otyryp, buqaralyq sport pen salaýatty ómir saltyn nasıhattaý maqsatynda #MenChempıonmyn bastamasyn júzege asyrdy», - dedi «TikTok» operatsııalyq bóliminiń aǵa menedjeri Nadejda Lapına.