Qazaqstandaǵy sýdıalardyń 52,6%-y qyz-kelinshekter

NUR-SULTAN. QazAqparat – QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa jyldyq jumysyn qorytyndylady, dep habarlaıdy QazAqparat tilshisi.

«Táýelsizdik jyldary elimizde otbasy ınstıtýtyn nyǵaıtýǵa, áıelderdiń quqyqtary men ekonomıkalyq múmkindikterin keńeıtýge, ana men balany qorǵaýǵa qatysty bastamalar kóterilip, ony damytý qolǵa alynyp keledi. Otbasy qundylyqtaryn saqtap, ony nyǵaıtý jalpy elimizdiń ári qaraıǵy damýyna áser eteri sózsiz. Óıtkeni tek baqytty, baqýatty otbasy eldiń birligi men berekesiniń tiregi bola alatyny aqıqat. Tek birligi jarasyp, berekesi kelisken el ǵana jetistikke jeteri sózsiz», - dedi Ulttyq komıssııa tóraǵasy Lázzat Ramazanova.

Otyrysta qaýipsizdik, sot jáne quqyq qorǵaý salalarynda qyzmet etip otyrǵan qyz-kelinshekter jaıly, sondaı-aq olardyń basshylyq qyzmetke taǵaıyndalýy týraly Joǵarǵy sot, Bas prokýratýra jáne Іshki ister mınıstrliginiń aqparattary tyndaldy.

Otyrys kezinde BUU Qaýipsizdik keńesiniń osy másele jónindegi 1352 qararynda kózdelgen bastamalar memleket tarapynan qoldaý taýyp jatqany aıtyldy.

Joǵary sot ókiliniń aıtýnysha, elimizdiń sot korpýsynda jumys isteıtin 2 382 sýdıanyń jartysynan kóbi qyz-kelinshekter (52,6%). Aýdandyq sottarda sýdıalyq qyzmettegi qyz-kelinshekterdiń úlesi de artýda (54,3%). Sot júıesindegi ákimshilik-memlekettik qyzmetshiler qatarynda qyz-kelinshekter sany 65,4%-y qurap otyr. Olardyń ishinde 370 (61%) qyz-kelinshek basshylyq qyzmette eńbek etip júr.

Al prokýratýra organdarynda 1071 qyz-kelinshek, ıaǵnı, jalpy qyzmetkerlerdiń 22%-y, onyń ishinde 73 áıel basshylyq qyzmet atqaryp júr. Іshki ister mınıstrliginiń komısısıa usynǵan aqparaty boınysha, keıingi bes jylda quqyq qorǵaý qyzmetinde de qyz-kelinshekter sany artqan. Búginde bul salada 12 414 qyz-kelinshek (14%) júmys istep júr. Onyń ishinde 657 qyz-kelinshek (5,3%) basshylyq laýazymdy ıelenip otyr.