Qazaqstandaǵy eń alǵashqy áskerı mektep 20 jyldyq mereıtoıyn atap ótti
Mektep basshysy, ádilet polkovnıgi Tileýhan Basqojaev qatysýshylardy mańyzdy mereıtoımen quttyqtady. Dástúr boıynsha ulandar mekteptiń týyn shyǵaryp, Halyq Qaharmany, Keńes Odaǵynyń batyry armııa generaly Saǵadat Nurmaǵambetovtyń eskertkishine gúl shoǵyn qoıdy.
QR QM Áskerı bilim jáne ǵylym departamentiniń bastyǵy, general-maıor Ashat Ryspaev ta óz quttyqtaýyn jetkizdi.
«Osy ýaqyt aralyǵynda siz qıyn jáne keremet shyǵarmashylyq joldan óttińiz. Sizdiń mektebińizdiń tarıhy - bul maman atanǵan myńdaǵan ul balalardyń taǵdyrlar tarıhy. Qurmetti áriptester, sizderdiń qoldaryńyzdan ǵajap is - adam qalyptastyrý keledi. Tek sizder ushqalaq baladan bolashaq sarbaz-ofıtserdi kóresizder. Barlyq úmitterińiz aqtalyp, atqarǵan jumystaryńyz jemisin bersin. Ár ulan mekteptiń maqtanyshyna aınalýyna tilektespin», - dedi ol.
20 jylda mektepte bolǵan is-sharalar men jetistikter týraly fotokórme uıymdastyryldy. Mereıtoı qarsańynda «Jas ulan – 20 jyl» atty kitap daıyndalyp, jaryq kórdi.
Alǵashqy «Jas ulan» mektebi 1999 jyldyń naýryzynda QR Úkimeti Jarlyǵyna sáıkes quryldy. Táýelsiz Qazaqstannyń Qarýly Kúshteri úshin mektep qabyrǵasynan bolashaq komandırlerdi daıyndaıtyn arnaıy oqý ornyn qurý - elimizdiń Tuńǵysh Prezıdenti Nursultan Nazarbaevtyń ıdeıasy.
Qazirgi kezde mektepte memleketimizdiń túkpir-túkpirinen jınalǵan 425 ulan bilim alýda. Almaty, Shymkent jáne Qaraǵandy qalalarynda taǵy úsh «Jas ulan» áskerı mektebi jumys isteıdi.
Áskerı mektepte tárbıelenýshiler memlekettik jáne shet tilderin, jalpy bilim beretin pánderdi tereńdetip oqıdy jáne dene shynyqtyrýmen shuǵyldanady. Mektep pánderimen qosa olar jalpy áskerı taktıka, baılanys negizderi, saptyq daıarlyq, jalpy áskerı jarǵylar jáne basqa da áskerı pánderdi meńgeredi.
Zamanaýı oqý-materıaldyq baza jańa tehnıkalyq quraldardy qoldana otyryp ınteraktıvti, kompıýterlik jáne lıngafon synyptarynda sapaly oqý protsesin uıymdastyrýǵa múmkindik beredi. Áskerı pánder boıynsha kabınette tájirıbe júzinde ótken taqyryptardy pysyqtaýǵa áskerı tehnıka men qarý-jaraqtyń jańa úlgileri bar.
Áskerı avıatsııany odan ári oqýdy josparlaǵan tárbıelenýshilerge áskerı ushqysh mamandyǵynyń negizderin oqýǵa múmkindik beriledi. 2007 jylǵy qyrkúıekten bastap «Memlekettik avıatsııa ortalyǵy» Respýblıkalyq memlekettik kásipornynyń negizinde ulandar úshin «Jeńil qozǵaltqyshty ushqysh» biliktiligi beriletin ushý daıyndyqtary boıynsha sabaq júrgiziledi.
Ulandar olımpıadada, ár túrli jarystar men týrnırlerge belsene qatysady. Olardyń jan-jaqty damýy úshin murajaı, teatrlar men sporttyq is-sharalarǵa aparady, ataqty ǵalymdar jáne tanymal sportshylarmen kezdesýler uıymdastyrylady.
Oqýyn odan ári jalǵastyrý úshin túlekter QR Qorǵanys mınıstrliginiń oqý oryndaryna jiberiledi. Sonymen qatar olar bilimin shet memleketterdiń áskerı oqý oryndarynda jalǵastyra alady. Qazirgi kezde «Jas ulan» astanalyq mektebiniń túlekteri Qazaqstan, Reseı, Belarýssııa, Ýkraına, Túrkııa, Qytaı áskerı oqý oryndarynda bilim alýda.
